Примера

Реал со пресврт до победа против Виљареал

10.01.2011, 11:08

Реал Мадрид повторно дојде до негатива од два бода во однос на лидерот Барселона, откако во дербито на 18. коло во шпанската Ла Лига, во драматичен дуел го совлада Виљареал со 4:2. Иако во два наврати гостинскиот тим имаше предност, сепак, Реал во првото полувреме успеа да стигне до изедначување 2:2, за во второто полувреме со уште два гола да стигне до победа и нови три бода.

Хет-трик за мадриѓани постигна Кристијано Роналдо, кој со 22 погодока се зацврсти на чело на листата на стрелци (четири повеќе од Лионел Меси), а четвртиот гол беше дело на повратникот во тимот, Бразилецот Кака. Стрелци на головите за гостите беа Кани во 7. и Рубен во 18. минута.

Покрај дербито во Мадрид, вчера беа одиграни уште пет натпревари во Примера. Постигнати беа следниве резултати: Мајорка - Алмерија 4:1, Осасуна - Хетафе 0:0, Еспањол - Реал Сарагоса 4:0, Расинг Сантандер - Спортинг Хихон 1:1, Леванте - Валенсија 0:1. Колото ќе го заокружат Херкулес и Атлетико Мадрид со дуелот закажан за вечерва од 21 часот.

Табела: Барселона 49 бодови, Реал Мадрид 47, Виљареал 36, Валенсија 34, Еспањол 31, Атлетико Мадрид 27 (еден натпревар помалку) итн.