„Вип преживеан“

На Тони Зен за малку му избегаа 50.000 евра

На македонскиот хип-хопер и единствен претставник на нашата земја во третата сезона на популарното реално шоу „Вип преживеан“, Тони Зен, за малку од раце му побегнаа 50.000 евра. Иако Зен се најде во финалето, победата ја однесе српскиот водител Андреј Маричиќ, а меѓу финалистите се најдоа и манекенката Катарина Вучетиќ и пејачката Гоца Тржан. Во последен момент од финалето беше исфрлена Тржан, па за главната награда останаа да се борат само Тони, Андреј и Катарина. Нашиот претставник го освои гласот на публиката од регионот, додека оној од Србија му припадна на Андреј Маричиќ, кој имаше најмногу симпатии и кај членовите на Племенскиот совет, кои на Зен му дадоа само три гласа, што заедно со оној од публиката не беше доволно за победа.

„Им се заблагодарувам на сите оние што ме поддржаа, но мислам дека сите заслуживме да победиме. Најголемата награда во ’Преживеан‘ ми се пријателите што ги стекнав“, изјави победникот Андреј Маричиќ, кој првата честитка ја доби од свршеница Марија.

Учесниците во „Вип преживеан“ минаа 32 дена на Филипини, јадеа се' и сешто, се натпреваруваа и ја тестираа својата издржливост.