ЕДИТОРИЈАЛ

Да ја прогласиме 2011 за година на лидерство

Соња Крамарска

Новата 2011 година, според многу параметри, е значајна за македонските граѓани, за Владата и за опозицијата. По четири и пол години владеење, Груевски мора да направи сумирање на резултатите. Граѓаните и избирачите со сигурност веќе ги имаат сознанијата, но ги чуваат за себе. Ќе ги откријат на некои наредни избори.

За да добие поени кај јавноста премиерот треба да повлече неколку храбри чекори. Да влезе суштински во преговори со Папандреу и да ги заврши до летото за да има време до крајот на годината да спроведе референдум и да се врати од Брисел со членска карта од НАТО.

Второ, да се погрижи пописот на населението во април да помине во најдобар ред, а операцијата да се спроведе транспарентно и без политички притисоци. Во негови раце е да ги неутрализира и притисоците од Тачи, од Селмани, но и од Ахмети. Груевски е премиер и во најголем дел резултатите на политички план и климата во земјата зависат од неговите чекори.

Груевски е тој што треба да стави крај и на говорот на омраза спрема политичкиот ривал СДСМ и да даде пример за култивирана политичка дебата. Ако продолжат социјалдемократите, и покрај тоа, да настапуваат со реторика како досегашната, негативните поени ќе одат на нивна сметка. Во секој случај, џентлменски е и политички културно премиерот да го направи првиот чекор кон запирање на говорот на омраза. Тоа не е тешко, доволно е само да ги смени инструкциите кон Бичиклиски.

Веќе е непријатно да се слуша низ политичките кулоари кои се математиките на шефот на Владата да не прави реконструкција на министрите. Медиумите во минатата година беа полни со стории за некои од првите луѓе на владините ресори. На пример, за министерката за култура Канческа-Милевска и исчезната тендерска документација, за првата полицајка Јанкулоска поради прекумерна употреба на сила и упад во парламентот, за Маневски, кој е дежурна тема во Брисел, за Коњановски, за шокантната состојба во здравството со кое министерува Бујар Османи...

Премиерот мора да покаже слух за критиките кон овие министри затоа што тоа се критики до Владата и, пред се', до него како претседател. Во спротивно, ако продолжи да ги игнорира, ќе растат шпекулациите зошто затвора очи пред очигледните слабости во неговиот кабинет. Како што кружат шпекулации за причината за неговата попустливост кон амбасадорот во Австралија, Перо Стојановски.

Познато е дека на Балканот постои специјална поврзаност и солидарност во владејачките гарнитури. Причина за тоа се парите и заедничкиот интерес. И покрај сите декларации за чесност и отчетност, се покажа дека ниту сегашната македонски Влада не е имуна на оваа балканска практика. Во премиерскиот кабинет постојат фигури што се поцврсти од спомениците на плоштадот. Никој не може да ги помрдне.

Во таа смисла, 2011 треба да биде година на политички исчекор во тој правец, кога Груевски веќе се изјасни (во новогодишниот говор) да не очекуваме поголеми економски резултати. Има работи, како што се економските текови, кои зависат од поширокото опкружување, а има и работи што зависат од политичката волја на премиерот. Затоа 2011 е крајниот момент кога премиерот треба да покаже повеќе лидерство, а помалку теснопартиско калкулантство.

Оваа година Македонија ќе прогласи полни две децении од независноста и од новите вредности што ги донесе плурализмот и новиот систем. Токму затоа одговорноста на Владата е поголема. На сегашната Влада падна да го заокружи тој јубилеј, и тоа треба да го направи на вистински начин.