Со две слаби на поправен

Задолжителна настава и за учениците што не одат редовно на часови

Жаклина Ѓорѓевиќ

Со само две слаби оценки на крајот од првото полугодие учениците се кандидати за дополнителна настава што ќе мора задолжително да ја посетуваат. На поправни часови ќе одат и оние што не ги посетуваат часовите по некој предмет или ако имаат слаби резултати за некој од предметите. Солидните ученици, пак, ќе одат на додатна настава, но за тоа ќе можат да одлучуваат сами. Ова се само еден мал дел од законските измени што се планираат во секторот образование, кои е предвидено да се воведат годинава доколку го поминат собранискиот филтер. Во собраниските архиви на стенд- бај се и многу други измени што нема да ги тангираат не само основците, средношколците, студентите, туку и наставниците и професорите.

Во Министерството за образование и наука коментираат дека измените за успехот не се случајни и дека се воведуваат бидејќи голем дел од учениците покажуваат слаб успех. Резултатите од државната матура во 2009 година покажаа катастрофални резултати. Дури половина од средните школи имаат успех меѓу еден и два.

Во законските измени се предвидува задолжителна дополнителна настава за ученици што покажуваат континуирано слаби резултати во учењето. Поточно, ако имаат најмалку две слаби оценки на крајот на првото полугодие; имаат слаби резултати по одреден наставен предмет; отсуствуваат од наставата по одреден наставен предмет или, пак, по барање на ученикот или на неговиот родител, односно старател.

„Ученикот упатен на дополнителна настава во текот на еден месец посетува дополнителна настава најмногу по два наставни предмета со најмногу четири наставни часа“, се наведува во измените. Во нив се прецизира дека учениците ќе добиваат неоправдани ако не доаѓаат на дополнителна настава. А за тоа ќе бидат известени родителите.

За талентираните ученици се организира додатна настава, која наставникот е должен да им ја понуди на учениците. Тие сами ќе одлучуваат дали да ја посетуваат оваа настава. Во измените стои дека училиштето најдоцна до 20 септември во тековната учебна година треба да истакне распоред за дополнителна и додатна настава за секој наставен предмет на видно место во училиштето и тоа да го достави до Државниот просветен инспекторат. За наставниците што нема да ја реализираат дополнителната и додатната настава ќе се поведе постапка за дисциплински престап.

Новина што се планира за годинава е и советувањето за родители на проблематични деца. Родителите ќе одат на советување кај училишниот психолог или педагог ако нивните деца имаат слаба по три или повеќе предмети, потоа ако имаат повеќе неоправдани или оправдани изостаноци или, пак, се недисциплинирани. На советување ќе одат и оние родители чии деца го навредиле наставникот, биле вклучени во тепачки; ако ученикот покажува асоцијално однесување или се однесува неморално или неетички. Ќе се советуваат и родители на деца на кои за кратко време им опаднал успехот.

Се планираат и измени што ќе ги тангираат наставниците од кои ќе се бара во иднина да имаат положено и државен испит, што ќе биде услов за да се вработат. Годинава измени ќе има и со екстерното оценување, кое повторно ќе се одложи за крајот на идната учебна година, а официјалното образложение е дека „наставниците и учениците не биле подготвени за негова реализација“. (Ж.Ѓ.)

Стоп за семејни вработувања

Со новите законски измени се забрануваат семејни вработувања на факултетите. Па така, за професори и асистенти не можат да се избираат роднини на актуелни професори, синови, ќерки, снаи, зетови или сватови. Во измените стои: „Во наставно-научно звање на некоја од високообразовните установи не може да биде избрано лице што има одбрането докторски труд на факултет каде што има засновано работен однос во наставно-научно, наставно, односно соработничко звање, лице со кое е роднина по крв, во права линија до кој и да е степен, а од странична линија до четврти степен или му е брачен, вонбрачен другар или роднина по сватовство до втор степен без оглед дали бракот престанал или не.

Вакви роднински врски се забранети и при одбрана на магистратура или докторат, каде што не се дозволуваат какви било роднински врски меѓу членовите на комисијата и кандидатот“. (Ж.Ѓ.)