Тоше Проески

Роденденски концерт со нови песни и цеде

На 25 јануари, денот на 30. роденден на македонската ѕвезда, ќе биде промовиран и нов носач на звук со 15 песни - „Со љубов од Тоше“

„Со љубов од Тоше“ е слоганот со кој меѓународната фондација „Тоше Проески“ го најавува традиционалниот концерт во чест на роденденот на големата македонска ѕвезда што ќе се одржи на 25 јануари во спортската сала „Борис Трајковски“.

На десеттина дена пред неговото одржување, организаторите ги објавија деталите околу претстојниот настан - предвидено е на сцената во „Борис Трајковски“ да настапат: Наум Петрески, Миле Кузмановски, „Синтезис“, Антонија Шола и други музички имиња, кои ќе бидат придружувани од бендот на Тоше, „Блу фанки индивидуалс“. Ќе настапат и членовите на хорот „Златно славејче“, кои заедно со своите другарчиња од Музичкиот кабинет од Крушево премиерно ќе ја испеат композицијата „Пасворд“, за која музиката ја напиша Тоше, аранжманот го направи Валентино Скендеровски, а текстот е на Огнен Неделковски. Во салата ќе бидат поставени и три лед екрани на кои постојано ќе одат снимки од Тоше.

Според најавите, на денот на 30. роденден на Тоше ќе биде промовирано и цедето насловено исто како и концертот „Со љубов од Тоше“, на кое се сместени 15 песни - 12 од нив се познати рок-хитови што ги пееше Тоше на своите настапи, плус две теми во негова изведба од Елтон Џон („Can You Feel The Lоve Tonight“) и Витни Хјустон и новата песна „Наслони главу на моје раме“ („Тути фрути“, Нино Нинчевиќ и Миро Буљан), која ќе биде придружена и со видеозапис, кој е правен во Загреб.

Почетокот на концертот е закажан во 20 часот. (К.Ш.)