Дали на менито во „Јасен“ ќе има само муфлони и фазани?

Што му текна на Иванов наредниот петок, 21 јануари, да ги повика Груевски, Црвенковски, Ахмети, Селмани и Тачи

Оливера Војновска


Не е познато што ќе има на менито во вилата во ловиштето „Јасен“ и дали претседателот Ѓорѓе Иванов и овој пат ќе ги угости лидерите на петте најголеми политичките партии со фазани и муфлони или ќе ги изненади со други специјалитети. Исто така, нејасно е што му текна на Иванов наредниот петок - 21 јануари, да ги повика Никола Груевски, Бранко Црвенковски, Али Ахмети, Имер Селмани и Мендух Тачи на лидерска средба со прилично амбициозна агенда. Претседателот ги понуди како теми: евроатланските интеграции на државата, обврските што произлегуваат од извештајот на ЕК, јубилеите што годинава ќе следуваат (20 години независност и 10 години Рамковен договор), како и пописот. Посматрачите на нашите политички состојби се скептични дека средбата на Иванов е резултат на некоја значајна замисла. Туку на неа повеќе гледаат како на чиста куртоазија и на потег со кој претседателот би излегол од „илегала“.

Иванов и пред осум месеци ги повика политичките лидери ��о „Јасен“, но само на неформална средба. Тогаш специјалитетите направени од фазани и муфлони не ги пробаа лидерите на ДПА и на Нова демократија, Тачи и Селмани.

Политичкиот аналитичар Ибрахим Мехмети вели дека досегашните средби кај шефот на државата не дадоа некаков резултат, па ни овој пат не очекува такво нешто. „Не мислам дека зад оваа иницијатива има некоја голема идеја. Иако нема ништо лошо во тоа да се среќаваат лидерите под покровителство на претседателот на државата. Дотолку повеќе што Македонија се' уште ја мачат транзициски проблеми“, смета Мехмети. Тој жали што Иванов досега не успеа да остави сопствен печат на функцијата и да ги придвижи работите, особено на планот на евроинтеграциите. „Неговата позиција, според Уставот, е прилично лимитирана, но, сепак, од самата личноста зависи како ќе се носи со функцијата и дали ќе успее да наметне аворитет. И во ваквата констелација на ингеренции Иванов, на пример, може да промовира дух на толеранција, заедништво, да ги наметнува сопствените гледишта за стратешките прашања и за иднината на земјата. Но, кај него се забележува недостаток на идеи. Не може да очекува со еден говор во парламентот да остави впечаток во јавноста. Тој е инертен, тивок претседател“, вели Мехмети.

Универзитетскиот професор Стево Пендаровски, кој беше советник на двајца поранешни претседатели, смета дека се работи за една алиби-средба и претпоставува дека на Иванов му е сугерирано да покаже одредена активност. Според него, самата агенда на која се набележани повеќе крупни теми, покажува дека тие не може да бидат предмет на еден состанок, туку се нафрлени за да се остави впечаток. „Кога ќе се каже дека на еден состанок ќе се разговара за три-четири стратегиски прашања како евроинтеграциите, името, пописот, јасно е дека тие ќе бидат само гребнати по површина. Тврдам дека за ниту една од нив не може да се донесе усогласен заклучок. Агендата е пренатрупана и состанокот е осуден на неуспех. Ако е целта само да испијат кафе, тогаш може да биде успешен. Но, ако е целта да се заземе заеднички став за било кое прашање, тоа нема да се постигне“, прогнозира Пендаровски. Во пресрет на новата прегоаварачка рунда со медијаторот Метју Нимиц, за него е поразбирливо средбата да била свикана само за името. Притоа нагласува „дека е чудно Иванов да се договара со Црвенковски и со Селмани, а не се знае дали Груевски и Ахмети имаат заеднички став за името“.

Инаку, пред Самитот на НАТО во Лисабон во ноември минатата година, лидерска средба кај претседателот Иванов иницираше пратеникот од ДС Павле Трајанов. Тој предложи лидерите на политичките партии да застанат зад единствена платформа за интеграција на Македонија во НАТО и за започнување на пристапните преговори за полноправно членство во ЕУ.

Тогаш немаше интерес за ваква средба ниту кај шефот на државата ниту кај премиерот.