Поглед
Собарката и „ѕверот“
 Димитар Чулев
„Жртва на сопствените хормони или жртва на местенка со пикантни детали“, констатираше „Утрински“ на истово место пред еден и пол месец кога „пукна“ секс-скандалот на првиот човек на ММФ, Доминик Штрос-Кан. И тогаш како и сега, изгледаше неверојатно како тоа 62-годишниот Доминик, горд на својата машкост, истрчува гол од бањата и ја брка собарката низ фоајето, конференциската соба, дневната и спалната соба од апартманот, кој чини 3.000 долари од ноќ и, на крајот, ја принудува на орален секс...
Немилата случка, која му ја уништи кариерата на моќниот шеф на ММФ, но влијаеше и на идната политичка сцена на Франција токму во моментите кога Строс-Кан срамежливо ги најавуваше своите амбиции за кандидатура за иден шеф на државата, се покажува како многу неверојатна. Сексуален контакт можеби и имало, а господинот во години и со длабок џеб сигурно платил за тоа...
Сапунскиот дел од драмата почнува кога се откри дека 35-годишната собарка, имигрантка од Гвинеја, подлажувала околу тоа кој кого силувал. Се чини, „ѕверот“ во пр��казната не е Строс-Кан, туку „невината“ имигрантка, која лажела при влез во САД и била вмешана во афера за перење пари со сомнителни „партнери“ и која проценила дека од сексот со првиот човек на ММФ може да ќари монетарна транша, која би и' обезбедила богата иднина.
Но, оние што го замислиле заплетот не сметале на малата „ситница“ дека пред судовите во САД се' е дозволено, но не и – да лажеш. Само како потсетување. На Бил Клинтон никој не му се налути за секс-аферата со Моника Левински. Опозиционите републиканци побараа импичмент, бидејќи лажел под заклетва дека немал врска со Моника... |
