Насловна

Се бројат деновите до нова влада

Груевски, најверојатно, до крајот на неделава ќе ги обелодени составот на кабинетот и владината програма

Светлана Унковска


Мандатарот за состав на новата влада, Никола Груевски, најверојатно, до крајот на неделава до Собранието ќе ги достави списокот со министри во новиот владин кабинет и новата владина програма. Рокот од 20 дена за составување на новата влада тече откако пред точно една недела шефот на државата, Ѓорге Иванов, му го врачи мандатот на Груевски. Тогаш беше најавено дека персоналниот состав на новиот кабинет ќе биде објавен многу порано.

Коалициските партнери ВМРО-ДПМНЕ и ДУИ се во завршни преговори, а освен договорите за првиот и за вториот ешалон на власта, останува и распределбата на некои од директорските места и функции во фондовите и во агенциите. Но, токму тука работите како да запнаа бидејќи најголем проблем е поделбата на најчувствителните функции во Министерството за внатрешни работи - Управата за безбедност и контраразузнавање и Агенцијата за јавна безбедност. ДУИ инсистира да ги добие токму нив откако министерството остана во рацете на коалицискиот партнер ВМРО-ДПМНЕ. Уште пред да почнат преговорите, интегративците рекоа дека нивни принцип ќе биде да има баланс во власта. Во двете партии и натаму владее молк околу тоа до каде се со разговорите, но дознаваме дека главен камен на сопнување во разговорите меѓу двете работни групи се токму распределбата на овие две управи во МВР. Вицепремиерот за Рамковен договор, Абдулаким Адеми, викендов, единствено, обелодени кои министерски ресори ги добила ДУИ, што е веќе познато. Тој, сепак, открива и дека се' уште не е договорена заедничка владина програма што фрла сомнеж дека и во овој дел работите не одат мазно, и покрај тоа што и самиот Адеми тврдеше дека двете партиски програми се компатибилни и дека ќе биде многу лесно да се усогласат. Од ВМРО-ДПМНЕ има информации само дека во своите министерски редови ќе има многу изненадувања и освежувања, но не откриваат кои ќе бидат адутите на партијата на Груевски.

Претседателот на Собранието, Трајко Вељаноски, вчера имаше средба со координаторите на пратеничките групи, на која е договорено в среда да биде закажана седницата што ќе има само формален карактер за утврдување на бројот на потпретседатели на парламентот и за донесување одлуки за формирање на собраниските работни тела, делегации и пратенички групи за меѓународна соработка.

Од Кабинетот на Вељаноски велат дека не можат да кажат кога ќе биде закажана седница за избор на новиот владин кабинет бидејќи се' уште не добиле дописот од мандатарот. Парламентот и натаму ќе има тројца потпретседатели од кои еден задолжително ќе биде од редовите на опозицијата. Најверојатно, на тоа место повторно ќе биде Јани Макрадули.