Најмалку 35 жртви во двоен бомбашки напад во Ирак
05.07.2011, 15:21
Најмалку 35 лица се убиени, а 30 се повредени денеска во двоен бомбашки напад во ирачкиот град Таџи, во близина на Багдад, соопшти ирачкото Министерство за внатрешни работи.
Според полициски извори, прво бил активиран автомобил бомба, а непосредно по тоа и втора експлозивна направа.
Нападите биле извршени врз општинската зграда, во која се наоѓа локалното претставништво на службата за издавање на документи за лична идентификација, како и седиштето на општинскиот совет. Бројот на жртвите може да се зголеми.
Таџи, со претежно сунитско население, се наоѓа на околу 20 километри северно од ирачкиот главен град.
Информацијата за нападот се совпаѓа со веста дека месец јуни е најкрвавиот месец за ирачкото цивилно население и за американските војници од почетокот на годината. Во претходниот месец во напади во Ирак загинаа 271 лице, од кои 155 цивили, 77 полицајци и 39 војници, како и 14 американски војници.
|
