Поглед

Нови поделби

Светлана Унковска

Огромните плоштади што се во план да никнат од двете страни на Вардар, едниот со проектот „Скопје 2014“ и најавениот плоштад „Скендер-бег“, ќе запишат уште едно ново поглавје во поделбите промовирани од македонските и од албанските партии. Иако и двете партии на власт, ВМРО-ДПМНЕ и ДУИ, декларативно тврдат дека работат за зближување на двата најголеми етникума, сепак, во реалноста забрзано го прокопуваат најголемиот јаз на етничка поделеност и, практично, водат политика на сегрегација наместо интеграција. Градењето на плоштадот „Скендер-бег“, дефинитивно, ќе ја задебели линијата на разединетост, бидејќи Албанците повеќе нема да чувствуваат потреба да преминат од другата страна на Вардар, на плоштадот „Македонија“.

И колку и да беше гласна ДУИ дека нејзиниот партнер, ВМРО-ДПМНЕ, со проектот „Скопје 2014“ прави силна етничка поделба и ги влошува меѓуетничките односи, сега истото тоа го прават самите тие. Затоа и не држи уверувањето на вицепремиерот Абдулаким Адеми дека градењето на овој плоштад воопшто не е компензација за проектот на нивниот партнер. Но, таквото инаетење само ќе оди на штета на граѓаните, бидејќи тие не сакаат да живеат одделно, но така ќе биде поради ѕидовите што им ги кренаа нивните политичари.

Можеби тоа е што и самите тие во Владата функционираат во свои поделени светови. Затоа што кога се планираше „Скопје 2014“, министрите на ДУИ никаде ги немаше, а сега кога се промовираше плоштадот „Скендер-бег“, министрите на ВМРО-ДПМНЕ никаде ги нема. Кога и двата проекта ќе бидат завршени и на едната страна на сред плоштад ќе се најде Александар Македонски, а на другата ќе стои Скендер-бег, тогаш од двете страни на Вардар ќе бидат паралелните светови на Македонците и на Албанците.