Јосип Броз-Тито - мит што трае 32 години

Многумина приврзаници на маршалот и вчера положуваа венци во Куќата на цвеќето во Белград

Пред 32 години, на вчерашен датум, почина Јосип Броз-Тито, доживотниот претседател на поранешната СФРЈ. Имаше 88 години и беше познат како водач на југословенските народи, светски државник, но и личност со историско значење. И по 32 години од неговата смрт, многумина му оддаваат признание за неговиот живот и дело.

Во Куќата на цвеќето во Белград, каде што е погребан, вчера многумина негови приврзаници положија венци и свежи цвеќиња. Во Скопје, членови на партијата Титови леви се поклонија пред бистата на Јосип Броз-Тито во истоимената гимназија и со венци и цвеќиња му оддадоа почит на маршалот.

По повеќе од три децении од неговата смрт и по повеќе од две децении од распадот на Југославија, кај некои граѓани се' уште е присутна југоносталгија. Периодот на социјализмот, според многумина, е обележан со голема социјална сигурност и чувство на безбедност. Некои, пак, го доживуваат Јосип Броз како диктатор кој се пресметувал со политичките неистомисленици. Трети сметаат дека СФРЈ била само вештачка творба, која по смртта на Тито доживеа распад.

Македонците може да го паметат Јосип Броз како личност во чие време се удрени темелите на државноста на Македонија, по АВНОЈ и АСНОМ, а како федерална единица на Југославија.

Тито беше на чело на Југославија 35 години, а имаше и углед на светски државник и беше еден од основачите на Движењето на неврзаните, во кое беа обединети земји од неколку континенти кои не беа членки ниту на Западниот ниту на Источниот блок - НАТО и Варшавскиот пакт. Под негово водство, Југославија се бореше против фашистичкиот окупатор во Втората светска војна. Беше претседател на Комунистичката партија на Југославија и на Сојузот на комунистите на Југославија и командант на оружените сили, се' до смртта во 1980 година. Тито остана запаметен и по тоа што во 1948 година му го кажа историското „не“ на Сталин. (Св.У.)