Мое ќоше

Како да се голтне жаба

Ерол Ризаов

Кој што проголта на патот за Европа

Секогаш кога државите кои сакаат да влезат во НАТО и во ЕУ ќе прерипнат една висока препрека, ми текнува на една мисла на Зоран Дограмаџиев, еден од ретките македонски новинари кој направи успешна меѓународна кариера. Дограмаџиев пред повеќе години напиша во „Утрински“ дека на трнливиот пат за Европа сите кандидати мора да голтнат по една жаба. Со јасна алузија дека тоа е многу полесно кога е во прашање мало жапче, а многу потешко кога ќе порасне. Колку побрзо, толку полесно, напиша тогаш до бесвест едноставно, а филигрански прецизно Зоран Дрвце. Деновиве на тоа патување тур де Еуроп по една голема жаба-крекачка одвај голтнаа Србија и Косово кога потпишаа договор како ќе се претставува во регионот поранешната покраина на Србија, Косово и Метохија, а по прогласувањето независност - Република Косово. Кога беше жапчето мало, или полноглавец, ќе беше помалку непријатно да се голтне, сега кога стана големо жабиште, само што не се задушија и Србите и Албанците, а повеќе или помалку им стана мачно на сите во околината.

Србија и Косово ја прерипнаа првата голема пречка. Потпишаа меѓу себе историски договор како самостојни независни држави. Потоа, двете страни прогласија без малку победа, смирувајќи ја сопствената јавност дека тоа е добро за Србија, односно за Косово. Меѓународната заедница, големите сили и соседите веднаш испратија честитки и охрабрувања, а радикалите и патриотите од двете земји го нарекоа ова предавство, капитулација и повикаа на востание. Од Германија и од Франција експресно стаса веста дека од утре Србија ќе биде кандидатка за ЕУ без нови ограничувања за почнување на преговорите, а Клинтонка од Вашингтон кажа дека и Косово е поблиску до ЕУ. Црна Гора ги почнува преговорите во јули, најверојатно, заедно со Србија.

Борислав Стефановиќ, шеф на српскиот преговарачки тим на дијалогот со Приштина, изјави дека со овој договор не е призната независноста на Косово. Тој вели дека Косово со ѕвездичка во фуснота е јасна назнака дека ова е за употреба само во регионот и само во два документа, а не е признав��ње независност. Едита Тахири, шефицата на косовскиот тим, мошне сугестивно објасни пред својата јавност дека ѕвездичката ќе се истопи како снегулка додека помине зимата. Така и ние мислевме дека ѕвездичката што ни ја ставија врз БЈРМ како фуснота само за употреба во рамките на Обединетите нации брзо ќе се истопи, ама еве ја остана речиси 20 години, иако во меѓувреме не' признаа 130 држави со уставното име.

Како и да е, Србија полека се ослободува од заробеништвото на веќе одамна изгубената територија и го почнува процесот за подготовка на амбиент и поволна клима, конечно, да се совлада реалноста дека некогаш светата српска земја е нова држава Република Косово. Албанците, пак, се соочија со вистината дека од независност до меѓународно признавање е долг патот и дека тој не може да се совлада без дијалог со Србија. Допрва Косово ќе мора да плати дел од цената за прогласувањето самостојност. Србија ќе ја испорача целата фактура откако ќе стане членка на НАТО и на ЕУ и кога за косовските евроинтеграции ќе треба да даде согласност.

Словенија навреме како и секогаш прва голтна мало жапче со италиј��нските имоти на Истра.

Хрватска голтна голема крастава жаба отстапувајќи и' на Словенија дел од морето во Пиранскиот Залив.

И Бугарија мачно проголта, ама затвори нуклеарна централа, една од своите најголеми инвестиции.

Романија ја наведна главата и направи сериозни отстапки за унгарското малцинство, што не би ги направила никогаш.

Црна Гора помина најлесно.

И така со ред дојдовме до Македонија и до Грција. Нашата жаба стана троглав змеј што ќе не' голтне сите. Аждерот е надвор од контрола. Блуе оган и нема јунак што може да го скроти. Напротив, оној што ќе го нахрани со тазе предавници и ќе го јавне станува вистински патриот. Се' така до оној ден кога ќе нема повеќе со што да се храни змејот. Од тој ден ќе почне да ги јаде своите јавачи. Така завршуваат оние што сакаат да одгледуваат и да јаваат змеј.