Владата на пат - на ред дојдоа Индија и Малезија

Голема делегација тргнува во лов на инвеститори во Њу Делхи, Бомбај , Куала Лумпур

По Велика Британија, Германија, Австрија, Сингапур, Јапонија, Белгија, Холандија и Турција, дојдоа на ред и Индија и Малезија. Од следната недела владина делегација на чело со премиерот Никола Груевски, вицепремиерот и министер за финансии Зоран Ставрески, министерот за странски инвестиции Бил Павлевски и Виктор Мизо, директорот на Дирекцијата за технолошки индустриски развојни зони, заминуваат право за Индија. Таму ќе посетат неколку градови, Њу Делхи, Бомбај и Пуна, град кој е центар на автомобилската индустрија. Овој сектор за нашата Влада како да стана целна група за привлекување инвеститори ако се има предвид дека постојните и најавените компании во зоната „Бунарџик“ се токму од автомобилската индустрија.

„Во овие неколку градови ќе ги претставиме можностите за инвестирање во Македонија. Посетите се организирани со помош на коморите од овие места и асоцијациите на автомобилската индустрија. Во Индија, на пример, ќе ни се приклучат и локални инвеститори на ’Џонсон мети‘ и на ’Мадерсан‘, кои се веќе во зоната ’Бунарџик’. Во Малезија, односно во Куала Лупмур ќе бидеме еден ден. Главно ќе разговараме со компании кои се веќе присутни на европскиот пазар или што сакаат да влезат на кај нас. Станува збор за големи компании кои работат во овие земји, а кои бараат нови локации каде што ќе ги доработуваат своите производи и ќе ги пласираат на европскиот пазар“, ни изјави вчера директорот на Дирекцијата за управување со слободни зони, Виктор Мизо. Тој не сакаше да открие нови информации во врска со странските инвеститори со кои веќе течат преговорите со Владата.

Засега нема информации ниту за ефектите од досегашните роуд-шоуа на Владата.

Последните податоци од Народна банка на Македонија покажаа дека во земјава лани влегле речиси 300 милиони евра, но овие вложувања немаат никаква поврзаност со роуд-шоуата од последниве шест месеци. Дали овој летачки поход по странски инвестиции ќе ни донесе инвеститори, ќе видиме по најмалку една година.

Економски експерти сметаат дека таквите патувања на Владата ја чинат државната каса стотици илјади евра. Со други зборови, иако има позитивни раздвижувања во економијата, сепак, факт е дека не се доволни само даночните ослободувања, туку дека треба да се средат уште многу политички и административни работи за да се намамат инвеститорите. Потврда за тоа е, според економистите, фактот што масовните посети на повеќе земји досега не донесоа конкретни инвестиции. (С.М.)