29.02.2012, 11:49 Тадиќ: Србија нема да прифати невозможни услови
Српскиот претседател Борис Тадиќ изјави дека процесот на приклучување кон Европската унија е комплексен и оти за време на тој процес секоја земја-членка може да поставува свои услови, но напомена дека Србија нема да ги прифати условите, кои за неа се невозможни и нема да се откаже од своите принципи.
- Доколку не ставиме црвена линија, никоја нема да не сфати сериозно, изјави вчера Тадиќ и додаде дека тоа се однесува и на прашањето за влашкото малцинство.
Според Тадиќ проблемот со Власите се состои во тоа што Романија очекува сите Власи, кои живеат во Србија да се определат како претставници на романското национално малцинство, а има Власи кои не го сакаат тоа.
- Ја разбираме Романија, но ние не можеме да се откажеме од своите принципи, рече претседателот и напомена оти еден од нив е почитувањето на меѓународните конвенции за човекови права, согласно кои секој граѓанин на Србија може да се определува по своја сопствена волја.
На прашањето кој ќе биде следниот чекор на Србија, доколку на самитот на ЕУ на 1 и 2 март биде потврден кандидатскиот статус, Тадиќ одговори дека земјата заслужува почеток на преговорите и оти единствена препрека во тој процес е косовското прашање.
|
