01.03.2012, 13:10 Вредноста на „Епл“ надмина 500 милијарди долари
Американскиот информатички гигант „Епл“ достигна вкупна пазарна вредност од 508 милијарди долари, откако при вчерашните тргувања на Њујоршката берза неговите акции пораснаа за 1,7 отсто достигнувајќи вредност од 544,39 долари.
Последниот раст на вредноста на акциите на „Епл“ се должи на очекувањата дека компанијата наскоро ќе донесе одлука за исплата на дивиденда на своите акционери, како и на најавите дека следната недела ќе претстави нов модел на „iPad“.
„Епл“ веќе подолго време е компанија со најголема пазарна на вредност во светот, а далеку зад неа на второто место е нафтениот гигант „Ексон Мобајл“, чија пазарна вредност изнесува 411 милијарди долари.
Досега само неколку компании успеале да достигнат пазарна вредност поголема од 500 милијарди долари, но тоа беше на краток рок, по што нивната вкупна вредност се намалуваше под оваа сума.
Тоа досега им успеа на „Ексон Мобајл“ во 2007 година, на „Мајкрософт“ кон крајот на 1999 и на почетокот на 2000 година, а во истиот период пазарни вредности од над 500 милиајрди долари достигнаа и „Сиско Системс“, „Интел“ и „Џенерал Електрикс“.
Сегашната вредност на „Мајкрософт“ изнесува 267 милијарди долари, на „Сиско Системс“ и на „Интел“ нешто над 100 милијарди, а на „Џенерал Електрикс“ околу 200 милијарди долари.
|
