29.02.2012, 14:13 Ховит: Македонија е подготвена за преговори со ЕУ
Известувачот за Македонија во Европскиот парламент во интервју за „МИА“
Македонија веќе подолго време е подготвена да ги започне преговори за влез во Европската Унија, истакнува во интервју за МИА известувачот за Република Македонија во Европскиот парламент (ЕП) Ричард Ховит.
На 6 март во ЕП во организација на Ховит ќе се одржи трибина насловена како „Да ја направиме 2012 година на успех“ на која еден од говорниците ќе биде и еврокомесарот Штефан Фуле. Според Ховит, тоа ќе биде можност за пошироко запознавање на јавноста со процесот на преговарање меѓу политичарите, и можност за добивање поддршка на балканските земји аспиранти за ЕУ.
- Хашката пресуда и почитувањето на меѓународното право - главниот аргумент со кои Република Македонија настојува да си го отвори патот кон евроинтеративниот процес е факт што Советот на ЕУ, одделно секоја држава - членка на ЕУ, како и секоја останата меѓународна институција, треба да го почитува, вели Ховит, но додава и дека, тоа не вклучува и постоење на кратка варијанта за решавање на спорот. Хашката пресуда, наведува тој, придонесува за надминување на проблемот, но решението ќе произлезе единствено од преговорите.
Во март ЕП треба да го усвои извештајот за напредокот на Македонија за 2011 година, во која Ховит повторно ја враќа придавката македонски, употребувајќи ги термините македонски јазик, македонски идентитет, македонска култура.
- Тоа е нешто што сметам дека е во целосна согласност со Обединетите нации, изјави Ховит. Генерално извештајот на Ховит претставува порака до ЕК за употреба на терминот македонски, и штетноста која изоставувањето на истата ја предизвика на државата, па и на регионот.
Поради неговиот став најавени се 164 амандмани за претстојната парламентарна седница на 14 март. Ховит признава дека неколку негови колеги веќе му најавиле дека ќе се изјаснат против извештајот.
Статус-кво ситацијата на Македонија е неприфатлива, смета Ховит. Тој го поздрави најавениот дијалог на високо ниво меѓу еврокомесарот Филе и премиерот Груевски. Според него, Европската комисија испраќа јасен сигнал дека сака да и помогне на земјата, но потсети и на предупредувањето на Филе дека препораката не е врежена во камен. Таа порака, смета Ховит, беше насочена во два правца. Едниот кон македонската Влада, а другиот кон ЕУ.
- Не можеме и не смееме да се држиме настрана и само да посматраме, изјави Ховит. Тој повтори и дека едно од решенијата може да биде и од неодамна креативниот предлог за постоење на временска рамка во која би отпочнал скрининг процесот. Тоа подразбира формирање на тимови и во Брисел и во Скопје кои би работеле на техничкиот дел за подготовка за почеток на преговорите за членство во ЕУ, а во меѓувреме да се водат преговорите за решавање на спорот со името.
|
