Здружен протест на Албанци и Македонци во Скопје

Наизменично на македонски и на албански се слушаа извиците „Бараме правда“, „Доста беше молк“

Бојан Шашевски


Двојното убиство во Гостивар повторно ја активираше граѓанската иницијатива „Стоп за полициската бруталност“. Младите уште еднаш излегоа на мирен протестен марш по скопските улици. Овој пат со пароли, постери и беџови на групата и' се приклучија и Албанци. Околу двесте граѓани Македонци и Албанци здружено го искажаа своето незадоволство од начинот на кој полицаецот во цивил ја разреши гостиварската расправија. Побараа брзо и фер завршување на случајот, независен систем на контрола на работата на МВР, но и одговорност од надлежните институции.

Поворката низ скопските улици ја водеа две споени знамиња. Со сонце и со орел. Наизменично на македонски и на албански се слушаше „Бараме правда“, „Доста беше молк“, „Стоп за полициска бруталност“, „Заедно сме посилни“, „Јанкулоска оставка, Котевски оставка!“.

Рутата на насобраната група тргна од Спомен-куќата на Мајка Тереза, по што демонстрантите запреа пред законодавниот дом каде што бараа оставка на министерката за внатрешни работи, Гордана Јанкулоска, и на нејзиниот помошник Иво Котевски. Групата повторно седна на асфалтот и со едноминутно молчење им оддаде почит на двајцата застрелани гостиварци. Од терасите и од околните локали ѕиркаа луѓе, а по повиците да им се приклучат, неколкумина случајни минувачи и го сторија тоа. На граѓаните не им беше дозволено да ја преминат раскрсницата меѓу улиците „Железничка“ и „Бихаќска“ и на влезот кон МВР ги пресретна обрач од вооружени полицајци.