29.02.2012, 13:23 Меркел е убедливо најпопуларниот германски политичар
Германскиот канцелар Ангела Меркел, и покрај бројните проблеми во својата коалиција и неодобрените мерки за помош на Грција, меѓу Германците е попопуларна од кога било претходно, покажа анкетата на Институтот за истражување на јавното мнение „Форс“, што денеска го објави магазинот „Штерн“.
Според анкетата, Меркел на скалата на доверба од 0 до 100 добила 64 поени, што е најмногу од формирањето на нејзината демохристијанско-либерална коалиција, во септември 2009 година.
На тој начин таа се најде за осум поени пред двајцата најпопуларни опозициски политичари од Социјалдемократската партија - Пер Штајнбрик и Франк-Валтер Штајнмаер, кои освоија по 56 поени.
Нејзините коалициски партнери либерали, и шефот на дипломатијата Гидо Вестервеле и вицеканцеларот Филип Реслер, слично и на претходните анкети, се наоѓаат на крајот од листата, со по 31 освоен поен.
Освен лично на Меркел, добро и оди и на најзината Христијанско-демократска унија (ЦДУ), затоа што оваа партија и нејзината сестринска партија- баварската Христијанско-социјална унија, ако сега има избори, ќе добијат 38 отсто од гласовите, додека коалициските партнери - либералите можат да сметата само на три отсто, што значи дека оваа партија може да стане вонпарламентарна партија.
СДП би освоила 26 отсто од гласовите, процент повеќе отколку во претходната анкета, а опозициските Зелени би имале 14 отсто доверба од гласачите. Левицата, наследници на поранешните источногермански комунисти би имала осум отсто, а Пиратите седум отсто.
|
