Русија и Македонија негуваат одлични односи



Претседателот на Република Македонија, Ѓорге Иванов денеска се сретна со Владимир Генадиевиќ Титов, заменик министер за надворешни работи на Руската Федерација

Претседателот Иванов и заменик министерот Титов на средбата констатираа дека Република Македонија и Руската Федерација негуваат блиски и пријателски односи, со континуиран политички дијалог на високо ниво, што придонесува кон натамошното развивање на политичките, економските и културните врски, соопшти кабинетот на претседателот.

Иванов изрази задоволство од активностите насочени кон поврзување на Република Македонија на стратегискиот проект Јужен поток, додавајќи дека со тоа ќе се отвори нова перспектива за економски развој на земјата. Двајцата соговорници посебно се осврнаа на можностите за продлабочена економска соработка, за натамошно зголемување на трговската размена водејќи се од позитивните трендови во извозот на македонски производи во Русија, и за можностите за зголемувањето на руските директни инвестиции во Македонија.

Соговорниците на средбата разменија мислења и за состојбите во регионот на Југоисточна Европа, европската финансиска криза и глобалната безбедност.

Претседателот Иванов се заблагодари на постојаното и принципиелно почитување на уставното име на Република Македонија, идентитетот и културната традиција на македонскиот народ од страна на Руската Федерација. Го информираше заменик министерот Титов и за актуелната состојба во разговорите за надминување на прашањето за името кое Република Грција го наметнува пред Република Македонија, соопшти кабинетот на македонскиот претседател.

Македонија и Русија потпишаа Програма за соработка во културата

Министерката за култура Елизабета Канческа-Милевска и заменик-министерот за надворешни работи на Руската Федерација Владимир Титов денеска ја потпишаа Програмата за соработка во областа на културата, образованието, науката и спортот меѓу Владата на Руската Федерација и Владата на Република Македонија со важност од 2012-2015 година.

Оваа Програма претставува правна рамка за интензивирање на односите меѓу Македонија и Руската Федерација, за поинтензивна соработка меѓу институциите, размена на проекти и уметници. Се отвора можност за заемно признавање на дипломите од високо-образовните установи во двете држави, а наскоро треба да се потпише и Спогодба за основање на културни центри.

Пред потпишувањето на Програмата, Канческа-Милевска оствари работна средба со Титов. На средбата таа изразила благодарност за поддршката од Руската Федерација околу уставното име, култура и идентитет.

Министерката Канческа–Милевска истакна дека досега со Руската Федерација имаат реализирано голем број проекти на институционално ниво и потсети на Деновите на македонската култура што се реализираа во Москва и во Санкт Петербург, на добро организираната културна соработка меѓу националните институции и на манифестацијата Денови на руската духовна култура во Република Македонија од 2010 година.

Таа им се заблагодари на сите уметници кои изработиле дел од експонатите, сликите и сцените во новата Национална установа „Музеј на македонската борба за државност и самостојност“ Музеј на ВМРО и Музеј на жртвите од комунистичкиот режим кој, како што рече, претставува гордост за Македонија.

Канческа - Милевска изрази задоволство од преведувачката и издавачката дејност меѓу Македонија и Руската Федерација, односно што голем број книги се преведени од македонски на руски јазик.

- Не планираме да прекинеме со соработката на културен и образовен план, туку да ја унапредуваме. Активно работиме на отворање на културно-информативни центри во двете држави, рече заменик-министерот Титов и ја потенцира важноста од овој документ за следните четири години.