01.03.2012, 11:27 Хрватскиот ДДВ од денеска изнесува 25 отсто
Стапката на данокот на додадена вредност (ДДВ) во Хрватска од денеска се зголемува од 23 на 25 проценти, што претставува втора по големина стапка во Европа.
Оваа основната стапка важи за сите стоки и услуги со исклучок на маслото и мастите, детската храна и водата, кои имаат стапка на ДДВ од 10 отсто.
Со измените на Законот за ДДВ, што Хрватскиот сабор ги усвои пред две недели, се предвидува од почетокот на идната година пониската стапка на данокот од 10 проценти да се применува и за храната, безалкохолните пијалоци, виното и пивото во угостителските објекти.
Експертите очекуваат новата стапка на ДДВ да резултира со раст на цените на поголемиот број стоки и услуги за 1,5 до два проценти.
Во следниве седум дена се очекува и зголемување на цените на бензините и тоа во два наврати - прво поради повисоката стапка на ДДВ-то, а потоа и во рамките на редовното усогласување со цената на нафтата на светските берзи.
Од денеска поскапува и градскиот превоз во Загреб. Билет за едно возење ќе чини 15 куни (два евра), дневниот билет 40 куни (5,4 евра), месечните билети за ученици и студенти 90 куни (11,9 евра), а месечните билети за граѓаните 360 куни (47,6 евра).
Покрај новиот ДДВ, од денеска во сила стапуваат и измените на Законот за данок на доход, со кои нивото на приходите ослободени од оданочување е зголемено од досегашните 1.800 на 2.200 куни (237 на 290 евра).
|
