Интервју: Политиката е моја најголема грешка

По се' што се случи, многу е силно чувството на горчина да се вратам во Македонија, вели Владо Димов, поранешен министер за здравство

Жаклина Хаџи-Зафирова


Размислувате ли да се вратите во Македонија откако е повлечена потерницата за Вас во врска со судскиот процес за наводна злоупотреба на службената должност?

Искрено да ви кажам, не сум размислувал за тоа. Во принцип, нема зошто да не се вратам, ама чувството ми е многу горчливо од сите овие години. Тоа не можам да го скријам. Во Македонија не сум бил веќе пет години. Засега не правам никакви планови, кога ќе мислам, ќе дојдам. Но, уште еднаш кажувам чувството на горчина ми е многу силно, зашто со ништо немам заслужено ваков однос. Ваква хајка и ваков линч каде што и вие како новинари сте учествувале не би сакал на никого да му се случи. Колку што јас знам, и професионално и како доктор, ништо не стои зад мене со што би заслужил такво нешто, ама се случи тоа. Чувството дека некој сака да ве направи најголем криминалец во државата и да ве срамнува со некој на кој не сакам да му го спомнам името, помислете како би се чувствувале?



Како се чувствувате далеку од Македонија? Дали се пронајдовте себеси како шеф на одделот за миниинвазивна и лапароскопска хирургија во софиската болница „Токуда“?

Не знам како би се чувствувале вие ако ви се случи сето она што ми се случи мене. По сето она што беше кажано, изречено, како може да се чувствува? Сигурно не може пријатно да му биде. Ама, во исто време не можам да се изначудам зошто (тоа веќе мислам на секого му е јасно) се оди толку многу контра некој човек. Сигурно, чувството не ми е пријатно. Во животот никогаш не сум имал проблеми професионално да се реализирам, а немам ни сега, како што гледате. Можеби најголем грев е човек да се занимава со политика. Ова го сметам како поука за себе и за другите. Можеби тој што во Македонија има друга професија освен политика и го бидува и за друго нешто, не е убаво да се занимава со политика, зашто еве и вакви работи можат да му се случуваат.



Добро, но ако се вратите во Македонија, дали би се вратиле само туристички? Не мислите можеби да се занимавате со политика понатаму?

Мислам дека ако некој човек може и умее да направи нешто за државата, би требало да го направи тоа, зашто тоа е некаков долг. Така сум размислувал цел живот. Во поглед на политичкото активирање, не сум размислувал, особено не во овој момент. Не размислувам нешто особено за тоа прашање.



Одржувате ли контакти со луѓе од СДСМ откако заминавте во Бугарија?

Одржувам врски со сите што ми биле пријатели. Одржувам врски и со пријатели и со луѓе од ВМРО-ДПМНЕ. Не сум себичен кога треба да дадам помош на кого било, без разлика што ми се враќаат работите на таков начин. Сепак, не сакам да генерализирам за целата држава, бидејќи тоа се лоши чувства. Инаку, нема ден, а да немам пациент од Македонија. Никогаш пациентите од Македонија не сум ги делел по боја, партиски или по друга основа. Тогаш не би бил професионалец. За мене тие се само пациенти. Никогаш професијата не ја мешам со политика. На пример, моја пациентка беше и Доста Димовска.



Мислите ли дека најголема грешка Ви беше тоа што се занимававте со политика?

Не можам да извлечам друг заклучок. За мене никогаш немало афери во струката, никогаш немало афери ни како министер. Или на некого лично му пречам како човек или на некого му пречело моето присуство во политиката. Ако ме прашувате за последните збиднувања, тоа е голема работа и мислам дека, сепак, зборува дека државата има судски систем. Зошто го кажувам ова? Затоа што тоа што ми се случувало мене може реално секому да му се случи. Од тој аспект, најдобро е дека таму, сепак, изгледа има луѓе кои имаат доблест, лице и размислуваат како вистински професионалци. Тука не зборувам само за правосудниот систем.



Како тогаш ги коментирате обвинувањата во судската постапка дека нелегално сте вработиле 17 луѓе во струмичкиот Медицински центар?

Ако сакате на еден човек да му измислите нешто, особено таму каде што има политички влијанија, се' ќе му извадите. Ама, само затоа се покренува едно прашање кое апсолутно не држи - министер не потпишува решение за вработувања. Не ги примам јас. Може ли како министер да распишете оглас, да примите некого на работа, да му потпишете решение и да го пријавите во Биро за вработување? Можно ли е тоа? Министрите поднесуваат барања за вработување за кадри што им се потребни, но тие не можат да вработуваат, зашто министрите не вработуваат. Второ, дали знаете дека тие луѓе уште работат? Никој досега не го оспорил нивното вработување, бидејќи секогаш се потребни кадри. Тоа е толку проѕирно и јасно што немам коментар за ова.



Дали имавте тогаш дозвола за вработување од Министерството за финансии?

Улогата на министерот за здравство во процесот на вработување е да дава мислење. Кога еден директор ќе ви објасни дека не може да прави дијализи, дека не може да работи брзата помош зашто нема доктори или шофери итн., тогаш сте должни да дадете мислење дали нешто такво е оправдано или не. И тука сопира целата ваша ингеренција. Ниту вработувам, ниту бркам од работа, ниту ги имам тие права и ингеренции. Ниту можам да му потпишам решение ниту да пријавам вработување во Биро.

Очекувате ли државата да Ви врати данок од над 400 илјади евра, како што беше објавено во медиумите?

Тоа се само произволни толкувања. Не сум дал 500 илјади евра за да ми вратат 500 илјади. Не сум дал ниту, пак, очекувам државата да ми врати толку пари. Од друга страна, целиот мој имот да се продаде два пати не може да се наплатат парите од данокот, зашто е јасно дека, како што покажува и судската одлука, тоа е апсолутна глупост. Тоа е оспорено од судот по сите основи. Јас сум единствен министер кој целиот свој живот го напишал во анкетниот лист. Ако треба, утре пак ќе го направам истото тоа зашто тоа ми е законска должност. Притоа, вие го проценувате имотот што сте го стекнале во животот по цени што се пазарни. И тука е сосема јасно. Ако татко ви, на пример, купил стан пред 20 години, колку ќе го пишете станот - 2.000 евра? Веројатно ќе го напишете со денешни цени, што нема никаква основа. Не сакам да ги коментирам тие работи зашто сум единствениот и изгледа најбогат на што веројатно секој се смее, кој сум напишал се' што имам како имот - јас и моето семејство. При стапување на должност и заминување од должноста, нема никаква промена во мојот имот. Целта на имотниот лист е точно тоа - дали има промена. Тоа е злоупотребено, но, на моја радост, судскиот систем во Македонија покажа дека има кондиција.