Црвенковски ја смени тактиката, но не и реториката

Токму идејата за иднината, односно колку таа се содржела во говорот на лидерот на СДСМ, Бранко Црвенковски

Наум Котевски

Додека Горан Пандев и неговата Надица даваа брачна заклетва пред Бога во струмичката црква „Свети петнаесет тивериополски маченици“, само преку еден ѕид, на плоштатчето (ако така може да се нарече) во Турското Маало се појави градоначалникот Зоран Заев, кој следен со зурли, тапани и оро, го официјализираше пред сограѓаните продолжувањето на бракот со политиката преку трета градоначалничка кандидатура.

Во таа сеопшта веселба, додека на куќите со разни бои висеа фоторепортери за да фатат некој папарацо-кадар од среќните моменти на најдобриот репрезентативен стрелец, најефикасниот, според СДСМ, градоначалник во земјава потврди дека не станува збор за брак од интерес, туку за брак кој се базира на идејата за подобра иднина.

Токму идејата за иднината, односно колку таа се содржела во говорот на лидерот на СДСМ, Бранко Црвенковски, на првиот од серијата митинзи најавени за летово, вчера се насочија сите аналитичари, а заклучокот е дека Црвенковски повеќе сака да дава оцени за работата на политичкиот противник, наместо да нуди решенија како кандидат за некоја идна власт.

Нема никакво освежување во реториката на поранешниот премиер и претседател, а сега лидер на опозицијата. Наместо по теркот на современото политичко изразување и комуникација со масите, 10 отсто од својот говор да го посвети на нападите кон противниците, а 90 отсто да издвои за да им ги соопшти на граѓаните своите замисли како да се промени ситуацијата, тој се потруди да го одржи во кондиција застарениот обратен модел - богат со хумористично иронизирање на реалната ситуација, не нудејќи ништо што како дискусија ќе претставува чекор напред во сегашната ситуација.

Други, пак, сметаат дека Црвенковски во случајов не е кандидатот за градоначалник и дека е доволно што во своето обраќање се осврнал на проектот за гасификација, како темел на борбата на опозицискиот СДСМ за зголемување на капиталните инвестиции, притоа потенцирајќи го во тој контекст, според него, недозволивото расипништво на власта, кое е највидливо низ призмата на проектот „Скопје 2014“.

„Деновиве слушам дека Владата со новиот проект за 13 милиони евра ќе вработела 8.000 луѓе. Толку вреди само споменикот на Александар Македонски, од кој големите патриоти се срамат и го нарекуваат ’Воинот на коњ‘. Значи, цената му е колку 8.000 работни места“, ќе потенцира Црвенковски во својот говор.

Универзитетскиот професор Јове Кекеновски очекувал таков настап на Црвенковски и смета дека, особено по самитот во Чикаго, се интензивирала реториката на лична дисквалификација.

„Современата политичка реторика бара на граѓаните да им се понуди излез од тешката ситуација, некаква алтернатива. Нападите кон противникот се веќе видена и прочитана работа. Нема потреба од толку ниски напади, бидејќи граѓаните гледаат што прави противникот. Но, ние сме далеку од светската практика“, вели Кекеновски.

Според него, само Љупчо Георгиевски на изборите во 1998 година повлекол исправен и современ потег во вербалната комуникација со електоратот, и тоа му донесе резултати на политички план.

„Тој тогаш јасно кажа дека нема да си дозволи целата програма да му се сведе на напад на противникот. И така и направи. Излезе со понуда и решенија“, додава Кекеновски.

Комуникологот Петар Арсовски, пак, смета дека не може да се носи заклучок по само еден митинг и дека поважно од говорот е тоа што, според него, СДСМ дефинитивно се активира.

„Најдобро е на крајот од низата најавени митинзи да дадеме оцена за тоа како Црвенковски и' се обратил на јавноста. Струмица и не е баш индикативен пример. Тоа е општина каде што СДСМ добро стои. Можеби на наредните митинзи во градовите каде што поддршката е помала тотално ќе ја смени реториката. Затоа мислам дека издржаната анализа треба да се остави за крај“, посочува Арсовски.

Според него, споменатиот проект за гасификација е најдоброто нешто што некоја партија може да го понуди на локално ниво.

„Тој проект повлекува низа страшно позитивни ефекти. Од отворање повеќе фабрики, зголемување на конкурентноста, намалување на давачките, да речеме, на болниците и останати институции... Што друго би требало да се понуди на локално ниво“, прашува Арсовски, кој како позитивен за опозицијата го оценува и обидот за доближувањ�� до граѓаните, како што беше спиењето на потесното раководство на СДСМ во домовите на струмичките селани, а не во хотел. За тоа дали ваквиот потег ќе придонесе за уривање на доминантната елитистичка слика за СДСМ кај граѓаните, Арсовски вели: „Работите не се менуваат преку ноќ. Но, ако продолжат во овој ритам, сигурно ќе има резултат. Секој граѓанин посакува да се интензивира таа комуникација со политичарите“, потенцира Арсовски.

За Кекеновски, пак, тој обид практично претставува лична деградација на СДСМ.

„Не може со години да се гради елитистички имиџ, па наеднаш да се бориш за руралниот. Тоа претставува копирање на начинот на кој функционира ВМРО-ДПМНЕ и ништо друго. Мислам дека тоа нема да им донесе поени“, вели Кекеновски.

СДСМ: Ќе нудиме решенија

Од СДСМ реагираат дека во изминатиот викенд највисокото партиско раководство се сретнало очи во очи со повеќе од 12 илјади граѓани од Струмица и од сите околни општини.

СДСМ, стои во реакцијата, и натаму остануваме посветени на непосредните контакти со граѓаните и на нудење решенија за нивните проблеми.

ВМРО-ДПМНЕ: Повторно елитизам од СДСМ

По митингот во Струмица, ВМРО-ДПМНЕ оцени дека излегле на виделина неколку нови негативни феномени, кои покажувале дека социјалдемократите не се промениле и дека нивните челници не можат да се променат.

„По 20 години во политиката и просечна животна старост од 45 години, тие се фалат дека првпат отишле во село и дека првпат јаделе компир-манџа. Ова е доказ за елитизмот на СДСМ. Дури и кога им одат дома со вакви изјави ги навредуваат луѓето. Ги потценуваат дури и сопствените членови, заборавајќи да им кажат во колку квадрати и каде се' тие живеат“, рече портпаролот на ВМРО-ДПМНЕ, Александар Бичиклиски.