Македонија и фрли ракавица на Грција

Владата презема иницијатива за динамизирање на дијалогот со нашиот јужен сосед

Гордана Дувњак

Македонија и' фрли ракавица на Грција, преземајќи иницијатива за динамизирање на дијалогот со нашиот јужен сосед. Но, колку ваквата понуда, која доаѓа во време кога нема никаква позитивна вибрација од „другата страна“ е израз на добра политичка волја, а колку, пак, во прашање е маневар да се одглуми конструктивност. Експертите се воздржани во очекувањата дека е можно да се случи некаков драматичен исчекор, но во принцип ја поздравуваат желбата за дијалог. Се разбира, доколку намерите се искрени!

Професорот по меѓународно право и поранешен шеф на дипломатијата, Денко Малевски, вели дека никој разумен не може да биде против почнување дијалог.Тој дури во најавените предлози, препознава елементи од Привремената спогодба од 1995 година, на кои во изминативе години не им се посветувало внимание.

„Дијалогот сам по себе е за поздравување. Но,она што буди сомнеж е што нашите политичари подолго време не демонстрираат сериозна волја за дијалог, туку отпор и напаѓање. Да бидам искрен, не гледам дека двете страни одат кон таа голема цел-помирување на грчкиот и македонскиот народ, па оттаму можно е дека станува збор за купување време, или, пак, за покажување иницијативност пред меѓународната заедница“, нагласи тој.

Сепак, професорот вели дека треба да и' се даде шанса на Владата да покаже до кој степен е искрена. Малевски нема да биде изненаден ако ваквата понуда наиде на „млака реакција“ од грчка страна.

„Грција е преокупирана со себе и со проблемите поврзани за економска егзистенција, па би било чудно кога во вакви моменти, приоритет би му дала на решавањето на спорот со името“, вели Малевски во изјавата за нашиот весник.

Викендов, од македонската влада најавија дека ќе ја динамизираат соработката и комуникацијата со Грција, со цел побрзо да се изнајде решение за спорот со името, затоа што сметаат дека поминало многу време без реакција од Грција. „Во функција на динамизирање на соработката и комуникацијата, предлагаме средби за унапредување на дијалогот и засилување на довербата, на различно ниво, помеѓу функционери од двете земји, и тоа на ниво на министри, премиери, или на кое било друго ниво што тие ќе го определат, нешто, за што повеќепати сме се залагале и повторно го реафирмираме. Исто така, сметаме дека динамизирање на разговорите во рамките на Обединетите нации е значајно и неопходно, процес, кој треба да продолжи со интензитет и суштина, а во кој се очекува изнаоѓање на решение“, изјави новиот портпарол на Владата, Александар Ѓорѓиев.

Како што беше објаснето, со цел да се подобри атмосферата и да се зајакне довербата, македонската влада предлага реализација на иницијативи кои значат оплеменување на односите меѓу двете земји, како регулирање на битни сфери кои се од полза и за граѓаните и за компаниите од двете земји.

За какви иницијативи станува збор?

Според Ѓорѓиев, се предлага потпишување на Декларација за пријателство и соработка, основање на заеднички образовно-историски комитет,потпишување Рамковен предлог за унапредување на билатералните односи меѓу Македонија и Грција, основање на заеднички комитет кој ќе биде составен од претставници на министерствата за внатрешни работи на двете земји, граничната полиција и царината, договорно регулирање на економската соработка преку склучување договор за одбегнување на двојното оданочување, основање на заеднички контакт центар на министерствата за внатрешни работи на двете земји“...

Ѓорѓиев додаде дека за овие иницијативи досега имале добиено негативен одговор, или никаков одговор, што не содејствува со вистински и рационален однос кон работите и покажува незаинтересираност за соработка. Но, се надева дека пристапот ќе биде променет.

Владата повторно ќе иницира и отворање нов граничен премин Маркова Нога-Герман, кој би бил во функција на сообраќајот меѓу трите земји во т.н. Евро-Парк Преспа, како и нов граничен премин Николиќ – Дојрани, но и реактивирање на граничниот премин Сеово, кој е и иницијатива на општините Гевгелија и Аксиополи (Бојмица).

„Подготвени сме за дијалог, за разговор, за аргументација, на средби на секое ниво, директни и под покровителство на Обединетите нации, со цел унапредување на нашите односи и надминување на отворените прашања“, додаде портпаролот на Владата, Ѓо��ѓиев, велејќи дека македонската влада ја разбира тешката ситуација на Грција во моментов.

Тој нагласи дека треба да се почне со конкретни иницијативи, нагласувајќи оти само со позитивен одговор Грција ќе покаже дека има посветеност, чувство за одговорност кон регионот и кон проширувањето на НАТО, посебно кон ЕУ, како што и впрочем, како што рече Ѓорѓиев, се залагаат во нивната стратегија.