Грција бара искреност од Скопје

Се надеваме кај соседната држава да надвладее гласот на здравиот разум, велaт од грчкото МНР

Од нашиот дописник
Миркица Поповиќ

Атина - Извори од грчкото Министерство за надворешни работи за саботните предлози од македонската влада за зголемување на дијалогот и соработката меѓу двете страни велат дека Грција очекува поголема искреност во билатералните односи од македонската влада. Од грчка страна постои дилемата како ќе се интензивира соработката и подобри довербата ако македонската влада наместо да помогне во креирање подобра клима, ја интензивира затегнатоста меѓу двете држави со негативна пропаганда против Грција на сите нивоа.

Конкретен официјален одговор на саботните предлози на портпаролот на Владата, Александар Ѓорѓиев, изостана од грчката страна, меѓутоа шефот на дипломатија, Димитрис Аврамопулос во првиот официјален говор во посочи дека очекуваат менување на реториката на македонската влада за да се создаде клима за побрзо наоѓање на решение на спорот за името.

Предлози на македонската влада поминаа без поголеми коментари во грчките медиуми.

Во фокусот на медиумите беше тридневната расправа во Собранието која вчера ноќта резултираше со гласање за доверба на новата влада.

Шефот на грчката дипломатија Аврамопулос, при презентацијата на приоритетите на грчката надворешна политика за спорот за името истакна дека прашањето за името не е само разлика меѓу двете страни во врска со историски настани или симболи кои имаат свое значење, туку прашање за почитување на меѓународното право. Според него, македонската влада „застранува, скршнува од насоката во која треба да се движат преговорите и со својата реторика и непоместливост создава дилеми кои е тешко логично да се објаснат и кои само ги отежнуваат билатералните односи“.

„Се надеваме кај соседната држава да надвлада гласот на здравиот разум. Треба да бидеме многу јасни кон нашите соседи, кон нашите партнери во ЕУ и нашите сојузници во НАТО. Бараме решение за спорот за името што ќе биде во согласност со меѓународното право“, истакна Аврамопулос. Посочи дека Грција во конструктивен дух направила голем чекор и се согласила на сложено име со географска одредница за севкупна употреба ерга омнес. Аврамопулос информираше Грција веќе отворила специјална канцеларија во ЕУ која ќе ги подготвува работите за грчкото претседателство во 2014, а една од целите на грчкото претседателство е веќе познатата „Агенда 2014“ за поддршка на европската перспектива на државите од западен Балкан.

Новинарот на „Катимерини“, Ставрос Ѕимас, вели дека предлози за подобрување на дијалогот меѓу двете страни е секогаш добредојдена работа, но предуслов за тој дијалог е да има добра клима меѓу двете држави. Негово мислење е дека треба да дојде до релаксирање на односите кои во овој момент се затегнати, снижување на вжештените тонови, како и дека треба да се избегнуваат отровни, екстремни изјави кои им штетат на билатералните врски. „Бев изненаден од реториката на господинот Никола Груевски, од неговата изјава за политички геноцид од грчка страна. Добар предлог е подобрување на дијалогот за соработка на економско, политичко ниво и соработка меѓу граѓаните, меѓутоа за се тоа мора да се создаде добра клима. Би требало да се избегнуваат нападите и реторика кои се отров за добрите врски меѓу двете страни“, вели Ѕимас.

Новата грчка влада според изјавите на Аврамопулос останува на истата позиција како и претходната за спорот за името. Меѓутоа една од пречките со кои ќе се соочи по пат е ултра-десничарската и нацистичката Златна зора, која е дел од новиот парламент. Пратениците на Златна зора неколкупати при тридневната расправа во собранието посочија дека не се согласуваат со политиката на владата за сложено име со географска одредница, односно остануваат на нивните екстремни ставови дека не треба да се даде Македонија, за која сметаат дека е една и грчка.

Офанзивно или во мат-позиција

Грчкиот весник „То вима“ посочи дека одредени грчки дипломати бараат иницијативи од грчката влада за спорот за името пред Грција да се најде во мат позиција. Причината за ова се сомневањата дека македонската влада во септември на генераното собрание на ОН би можела дапобара признавање под уставното име, но и замореноста која постои во ЕУ, НАТО и Вашингтон од застојот во преговорите за името. „Во тајни документи до кои дојде „То вима“ најмалку тројца главни амбасадори во своите извештаи во заклучоците пишуваат дека доколку Атина седи задоволна од непоместливоста на владата во Скопје, ќе се соочи со непријатни изненадувања“, се вели во анализата. (М.П.)