Улогата на „бронзата“ во изборната битка

Еден од најкрупните проекти на актуелната владејачката гарнитура нема поддршка од мнозинството граѓани. Но, дали тоа може да значи ветар во едрата на опозицијата, пред локалните избори?

Александра М. Митевска



Мнозинството граѓани (57,8 проценти) не го поддржуваат „Скопје 2014“. Еден од најпрепознатливите, но и најконтроверзни проекти на актуелната владејачката гарнитура има поддршка од 26,4 проценти, покажа неодамнешното истражување на јавното мислење, што го спроведе „Брима- галуп“ по иницијатива на „Плоштад слобода“. По пласирањето на овие резултати, се наметна прашањето - до колкав степен негативните ставови за инвазијата од споменици во центарот на главниот град може да влијаат на политичкото расположение на гласачите? Односно, дали негативниот тренд во поддршката за проектот може да значи ветар во грбот на опозицијата?

Дилемата добива специфична тежина поради тоа што се отвора на пет месеци пред локалните избори, за кои веќе подолго време е во полн ек неформална кампања. Во изминатиот период токму локалните власти ја имаа главната (извршна) улога во поставувањето на спомениците. Сепак, Владата се смета за идеолог на проектот кој, според опозицијата, навлегува во меѓуетничките односи, ја нарушува меѓународната позиција на државата, нема историска оправданост, не ги задоволува естетските критериуми и претставува голем луксуз во време на голема економска криза...

„Додека расте стапката на невработеност и сиромаштија, а се зголемуваат цените на нафтата и струјата, власта се расфрла со народни пари за барокното лудило“, критикуваа социјалдемократите летово за време на собраниската расправа што ја иницираа за проектот „Скопје 2014“.

Опозиционерите тврдеа дека сумата за спомениците, од најавени 80 милиони евра, достигнала до 500 милиони евра и бараа, наместо за бронза, парите да се искористат за подобар живот на граѓаните и за енергетски проекти.

Ѓорѓи Кимов од „Брима - галуп“ вели дека стандардот на граѓаните и на претстојните локални избори ќе биде оската околу која се врти расположението на гласачите.

„Ако граѓаните чувствуваат дека нивната куповна моќ опаѓа, тогаш е очекувано нивните политички ставови да натежнат кон опозицијата. Владејачката гарнитура, пак, би можела да задржи поволни позиции ако, користејќи ги моќта и механизмите со кои располага, успее да го санира тој негативен тренд“, вели Кимов.

Тој посочува дека „Скопје 2014“ е пропаганден проект, додека секојдневните проблеми се нешто со што граѓаните директно и лично се соочуваат. Поради тоа, тие проблеми имаат поголемо влијание при градењето на политичките ставови на гласачите отколку импресиите што се создаваат врз основа на пропаганда.

Универзитетскиот професор Јове Кекеновски напоменува дека, генерално, не им верува на анкетите, бидејќи тие, најчесто, се ставаат во функција на нивниот нарачател. Сепак, вели тој, под услов презентираните резултати за „Скопје 2014“ да се објективни, тој тренд на опаѓање на поддршката, најверојатно, ќе има свој одраз на резултатите на локалните избори.

„Револтот на граѓаните го гледам во тоа што тие се' повеќе осиромашуваат и се' потешко врзуваат крај со крај, а од друга страна се соочени со мегаломанија“, вели Кекеновски.

Опозициските социјалдемократи изненадија многумина кога најавија дека завршниот протестен митинг од проектот „работно лето“ планираат да го одржат на плоштадот „Македонија“ во Скопје, каде што ќе ги промовираат своите кандидати за градоначалници во скопските општини. Одбирајќи ја локација што до скоро ја одбегнуваа, токму поради тоа што преку неа се прекрши „Скопје 2014“, социјалдемократите ќе се обидат уште еднаш да испратат порака за, како што велат, апсурдноста на овој проект, особено во период на галопирачка сиромаштија.

На последните локални избори (во 2009) опозицијата неславно помина во главниот град, освојувајќи ја единствено општина Карпош. Од СДСМ сега велат дека во изминатите години во дел од скопските општини се сменило гласачкото расположение во нивна корист. Во ВМРО-ДПМНЕ, пак, велат дека „Скопје ќе остане вмровски град“.