Грчки стравови од Македонија во НАТО

Што ако на состанокот во Чикаго во мај, сепак, биде покренато прашањето за македонското членство

Од нашиот дописник
Миркица Поповиќ

Атина - И покрај уверувања од грчкиот државен врв дека шансите Македонија да добие покана за прием во Алијансата се непостојни ако нема решение за името, и покрај „смирувачката изјава“ на генералниот секретар на НАТО, Андерс Фог Расмунсен, некои медиумите во Грција го поставуваат прашањето што ако на состанокот во Чикаго во мај, сепак, биде покренато прашањето за македонското членство.

Во анализа на оваа дилема, грчкиот весник „Катимерини“ пишува дека европските држави и САД држат дистанција од спорот за името и не притискаат за членство на Македонија во меѓународните организации со цел да избегнат создавање нови социјални нереди и проблеми.

„Европејците и Американците се плашат дека едно понижување околу спорот за името би можело да предизвика експлозија и излив на гнев кој постојано расте во грчкото општество поради економската криза. Таква експлозија нема да создаде проблеми и пресврт само внатре во државата, туку е можно да ги дестабилизира и другите слаби алки на еврозоната, што би довело, пак, до дополнително влошување на кризата на еврото“, се вели во анализата на „Катимерини“. Според весникот, ова е главна причина зошто Вашингтон не одговара на постојаните барања за помош од македонскиот државен врв, како и причина зошто германската канцеларка Ангела Меркел при средбата со премиерот Никола Груевски останала на ставот дека мора да име решение за името за Македонија да стане членка на Алијансата.

Хашката одлука, која како главен аргумент ја користат македонските политичари, според грчкиот весник, не е доволно силна за да издејствува покана за нашата држава во Чикаго.

„Генералниот секретар на НАТО и САД не сакаат да дозволат одлука од Хаг да биде одлучувачки критериум. Нешто такво би создало непожелен преседан“, коментираат од „Катимерини“. Во анализата се забележува дека средбата на медијаторот Метју Нимиц со македонската и грчката страна покажала дека македонскиот премиер планира многу силно да ја искористи одлуката од Хаг како карта за прием во НАТО, поради што и дипломатски е активиран за подготовка на теренот пред самитот во мај. Се споменува и тоа дека македонскиот државен врв почнува да игра со идејата да влеземе во НАТО под привремената референца наместо под уставното име. „Меѓутоа, да потсетиме, кога и да се има случено ова (Македонија да биде примена во организација под референцата н.з.), Славомакедонците се обидуваат потоа да наметнат користење на нивното уставно име“, пишува весникот. Според „Катимерини“, засега никој не реагира на играта на македонскиот премиер. Весникот коментира дека иако постои еден вид институционална пречка за прием на нашата држава во НАТО, поставена со одлуката на Самитот во Букурешт во 2008 година дека е потребно решение за името, сепак, тоа не е доволно да се спречи покана за наше членство на претстојниот самит и е потребно да биде придружено од политичката волја на членките на Алијансата. Весникот смета дека никој нема да поттикне прашање за покана со цел да не предизвика поголеми проблеми во Грција и еврозоната. „Меѓутоа, големите членки на Алијансата можеби не го охрабруваат Груевски, но не го ни обесхрабруваат.

Со поддршка од Турција и од Словенија се обидуваат да си обезбедат поддршка и од други членки со цел на самитот во мај да биде иницирано прашањето за членство или барем да дојде до подобрување и унапредување на сегашната врска која ја имаат со НАТО“, смета грчкиот весник. Освен Турција и Словенија, „Катимерини“ и „То вима“ забележуваат дека Македонија се надева и на поддршка од Велика Британија, која засега не ги отвора картите за ова прашање. Според грчки извори, можно е нашата држава да добие британска поддршка поради одредени геополитички интереси на Британија поврзани со Балканот и еврозоната.