21.05.2012, 13:55 Сан Антонио ги збриша клиперси
Спарси славеа со 102:99 и со максмимални 4:0 се пласираа во финалето на Западот
Сан Антонио е првиот финалист во Западната конференција на НБА-лигата. Спарси го совладаа Лос Анџелес клиперс со 102:99 и со максмимални 4:0 останаа единствениот тим без пораз во плејофот. Составот на Грег Попович на идентичен начин ја елиминира и Јута, а 18. победа во низа е доволен доказ дека Сан Антонио сезона е еден од најсериозните кандидати за шампионската титула.
За разлика од претходните дуели, „мамузите“ победникот го решија во последната четвртина. Тексашаните најдоа решение за расположениот Крис Пол, а благодарение на мирната рака на Тони Паркер дојде до осмата победа во плејофот. Во последната минута францускиот репрезентативец постигна пет поен��, доволни за четвртиот триумф. Тој средбата ја заврши со 17 поени и пет асистенции, а Тим Данкан застана на 21 кош, девет скока и четири додавања. На другата страна Крис Пол беше број еден во таборот на клиперси со 23 поени, 11 асистенции и шест скока .
„Клиперси имаат одличен тим и воопшто не беше лесно со нив. Во текот на целата серија ни беше потребен еден ваков натпревар и го добивме во вистинско време. Се боревме максмимално и погодивме кога најмногу беше потребно“, изјави Паркер.
Во финалето на Западот, спарси ќе го чекаат подобриот од дуелот меѓу Оклахома Сити и Лос Анџелес лејкерс, каде што тандерси водеа со 3:1 пред синоќешниот петти меч.
Мајами, пак, израмни на 2:2 против Индијана во полуфиналето на Истокот, совладувајќи ја на гости со 101:93, а дуелот го обележа неверојатната партија на Леброн Џејмс. МВП на сезонава во Индијанаполис постигна 40 поени, 18 скока и девет асистенции, а последен пат ваков ефект е постигнат во далечната 1961 година. Џејмс го надмина и рекордот на Мајкл Џордан, кој една од средбите во плејофот против Њујорк ја заврши со 40 поени, 15 скока и девет асистенции.
На средината на третата четвртина пејсерси имаа позитива од 61:51, но тогаш на сцена стапи Џејмс, кој со серија поени и маестрални асистенции во целост го врати во игра својот тим. На неговата одлична игра се приклучи Двејн Вејд, кој имаше лош старт, отворајќи го натпреварот со само еден поен од осум обиди.
Во овој дел од мечот гостите направија серија од 25:5, која им донесе водство од 80:79 пред стартот на последниот период. Пејсерси се обидоа да ја вратат предноста, но тандемот Џејмс-Вејд не го дозволи тоа. Вејд средбата ја заврши со 30 поени, од кои 22 во второто полувреме.
|
