22.05.2012, 11:27 Клаус: Не е виновна Грција, Европа се соочува со систематска криза
Чешкиот претседател Вацлав Клаус смета дека актуелната грчка криза е само врв на ледениот брег, а главен проблем на Европа е фундаменталната системска криза, која произлегува од заедничката европска валута.
„Грција е речиси ништо. За весниците секако дека е најлесно да прават наслови за Грција. Вистинскиот проблем е многу подлабок и поширок. Грција е жртва на лудото уредување на Европа. Грција не ја создаде кризата и повеќе е жртва на ирационалниот монетарен распоред, изјави Клаус во обраќањето на Конференцијата организирана од Институтот Хартланд во Чикаго, чии делови пренесоа чешките медиуми.
„Можете да замислите, да ги споите валутите на Северна Америка, Канада, САД и Мексико за да создадете заедничка валута и потоа да се изненадите дека тоа не фукционира? Смешно е, но тоа и се случи на Европа“, додаде Клаус кој е познат евроскептик и критичар на ЕУ.
Тој и претходно изјави дека брзото враќање на Грција кон драхмата би помогнало кон решавање на должничката криза во еврозоната.
Во излагањето, Клаус изрази задоволство од резултатите на неодамнешната анкета на јавното мислење во Чешка, според која само пет проценти од граѓаните цврсто го поддржуваат воведувањето на еврото во земјата.
Чешката Влада во март сопшти дека и покрај ставовите на Клаус, не отстапува од намерата да го воведе еврото, иако нема конкретен датум до кога би се извршило воведувањето.
Владата го отфрли барањето на претседателот, Чешка да се изземе од обврската за пристапување кон заедничката европска валута.
|
