Шекеринска: Зошто го прикривавте убиството на Нешковски

Додека се дискутираше за интерпелацијата, надвор имаше протести

Пратеничката на СДСМ, Радмила Шекеринска, жестоко ја критикуваше министерката за внатрешни работи, Гордана Јанкулоска, и ја нарече одговорна за создавање систем во кој моќта и силата се поважни од законот, а партиската книшка поважна од професионалноста, систем на покажување сила, насилство и ароганција. Таа праша како е можно полицијата цели два дена да го прикрива убиството на Мартин Нешковски, да го крие полицискиот билтен за време на случувањата и како е можно тогаш да не работеле камерите на плоштадот.

„Колку повеќе зборувавме за случајот ’Нешковски’, толку повеќе молчевте на вистинските прашања. На пример, го премолчивте клучното прашање - како е можно да вработите човек чии психо-анализи покажаа дека е насилен“, обвини Шекеринска. Покрај ова, таа ја праша министерката и како се трошат парите, бидејќи секоја година ова министерство има најголем буџет.

„Само за 12 проценти од јавните набавките се објавуваат тендери, сите други набавки ги правите во четири очи, со фирми кои не плаќаат данок. Значи едни ќе бидат уапсени за неплаќање данок, а други се најголеми тендерџии на Министерството за внатрешни работи. Дали е тоа вашата неселективност“, праша Шекеринска. Наспроти тврдењата на Јанкулоска дека министерството работи професионално и се откриваат кривични дела, Шекеринска рече дека, според податоците од самото Министерство, криминалот и кривичните дела се во пораст, а опаѓа бројот на откриени криминалци и на решени случаи.