Петровски - лани и сега

Демократската десница, што некогаш истакнатиот младинец на ВМРО-ДПМНЕ, Филип Петровски, амбициозно ја најави пред ланските избори, не успеа да го одбележи ниту првиот роденден. Два дена пред годишнината од промоцијата на ДД (на 14 февруари 2011 во хотелот „Холидеј ин“), нејзиниот основач објави дека се враќа во ВМРО-ДПМНЕ.

Оваа вест не предизвика големо изненадување, бидејќи дојде во екот на акцијата на владејачката партија за враќање на кадрите што своевремено се одметнаа од неа. Но, да се случеше ова неколку месеци порано, веројатно многумина ќе беа запрепастени од преобразбата на Петровски, поради острите критики што тој ги испраќаше кон ВМРО-ДПМНЕ и Владата (голем дел преку колумни во „Утрински весник“), но и поради неговите напори за обединување на помалите партии на десницата против ВМРО-ДПМНЕ.

„Никогаш не поверував дека оваа гарнитура е нешто посебно патриотска и со енергија да направи нешто позитивно за нашата живејачка. Уште во 2003 година се спротивставив на изборот на Никола Груевски за партиски претседател. Оти знаев дека, пред се', не е автентичен вмровец“, ќе забележи тој во март минатата година.

Петровски, уште кога беше потпретседател на ОМ, „навиваше“ владејачката партија да го избрише од името предзнакот ВМРО: Додека ВМРО-ДПМНЕ, летото 2010, се подготвуваше за големата прослава по повод 20-годишнината од основањето на партијата, Петровски изјавуваше дека е направен историски рез, дека сите основачи се отстранети од партијата и насила се создава ново водство.„Тоа е јасен показател дека целосно се сменети концептот и идеологијата на партијата и дека, аналогно на тоа, партијата треба да си го смени и името“, оцени тој.

Пред изборите на 5 јуни, Петровски тврдеше дека од четирите помали опозициски партии што се ориентирани надесно, најмалку две работеле за да го задржат премиерот на власт и во таа пригода напиша: „Некој сфатил дека со малку пари може да ја растури идејата за промена на режимот во државата“.

По изборите, Петровски повлече два потези што се сметаат за доблест во политиката. Најави заминување од челната позиција во ДД: „Го прифаќам изборниот пораз, а ќе размислам дали и во иднина ќе се занимавам со политика“, рече Петровски. Потоа, тој се откажа и од пишувањето колумни: „Ова нека биде последната колумна. Некогаш е подобро само да се гледа, да се молчи, отколку да се коментира“. (А.М.М.)