Разулавено момче пукаше по улици, рани тројца минувачи

Харис Б. (20), кој дивееше во скопски Хиподром, е уапсен, повредените се во болница

Горан Адамовски



Дваесетгодишно момче од Скопје повреди тројца сограѓани во крвав поход на улиците во населбата Хиподром и на автопатот кон Куманово. Вчераутро, под дејство на алкохол, со автоматска пушка гаѓал неконтролирано пред себе, случајните минувачи во страв бегале од најлошото. Тројцата повредени се надвор од животна опасност. Семејството на напаѓачот е во шок. Велат дека детето било мирно и се чудат како е можно да се случи ваква работа. Од полицијата, пак, соопштуваат дека тој и претходно бил пријавуван за кражби, разбојништва и за нанесување тешка телесна повреда.

Инцидентот на улицата „Пехчевска“ се случил вчераутро, педесетина минути по полноќ. Харис Б. ја зел пушката од својот дом, каде што ја криел, излегол на улица и испукал неколку куршуми.

Движејќи се пеш, дошол на улицата „Жан Жорес“, каде што наишол автомобил „мазда“, управувана од 23-годишник, во кое имало и сопатник. Харис се доближил до возилото и испукал неколку куршуми. Возачот на нападнатото возило свртел наназад и во паника почнал да бега, а разулавеното момче со пушка трчало по него и пукало. По ова, Харис се упатил кон автопатот за Куманово, налетал на друго возило „голф“, во кое биле 28-годишно момче и неговата девојка. И тие биле цел на неговиот напад. Напаѓачот пукал, за среќа, не ги погодил. Сепак, патниците од возилото биле расечени од скршеното стакло во кое завршиле куршумите. Нападнатите, откако се засолниле, го пријавиле случајот во полиција. Со возило на Итна помош биле пренесени во болница, каде што им биле санирани исечениците.

Додека да пристигне полицијата, напаѓачот дивеел врз уште едно возило. Начекал такси-возило „рено лагуна“ и пукал во него. Преплашениот таксист се наведнал под воланот и така возел триесетина метри наназад, по што изгубил контрола врз возилото и делумно излетал од патот. Излегол од автомобилот и почнал да бега, но Харис трчал по него и пукал. Таксистот се засолнил во хотелот „Белви“ и побарал помош.

Дивеењето на Харис било сопрено од „алфите“, кои го пресретнале во селото Инџиково. Му рекле да го предаде оружјето, тој ја вперил пушката кон нив, по што бил совладан.

Жителите на Хиподром велат дека се исплашиле од силните пукотници во глувата ноќ.

„Не знаевме што е работата. Иако дома легнавме на подот за секој случај, да не долета нешто“, вели еден од станарите на зградата во чија близина се случи инцидентот. Тие добро го знаат соседот Харис. Некои велат дека било добро и културно дете и секогаш ги поздравувало. Други, пак, тврдат дека бил проблематичен, крадел во трафики, се тепал...

„Се прибирав дома со автомобилот, го видов Хари, имаше качулка на главата, трчаше, а во рацете имаше оружје. Се стаписав, помислив дека во мене ќе пука. Дадов гас на педалот и побегнав во рикверц, а потоа колку што можев подалеку по најблиската уличка“, вели еден од жителите на населбата.

Соседите велат дека Харис бил најстар од четирите деца. До пред неколку месеци, сите живееле во зградата број 7 на улицата „Пехчевска“.

„Се отселија, заминаа под кирија. Тука останаа само бабата и дедото“, велат тие. Бабата Фадила има сериозни здравствени проблеми. Ја здогледавме кога излегуваше на прошетка.

„Дома го имав, мирно дете, не можам да поверувам дека направил таква работа. Не знам од каде му е оружјето, не знаев дека има. Вечерта беше на гости за Младенци, беше пијан. Јас спиев, а сопругот му рекол да си легне. Ама не го послушал, излегол надвор и ете што се случи “, се јадосуваше бабата Фадила.

Против Харис Б. полицијата поднесе кривични пријави за убиство во обид, недозволено изработување, држење и тргување со оружје или распрскувачки материи и напад врз службено лице при вршење работи на безбедноста.