Фармерите пуштени на слобода

Семејството Илиевски не било здружено за организиран криминал, оцени Обвинителството

БИТОЛА - Море од солзи радосници на улицата „Коста Абрашевиќ“ бр. 39 во Битола. Во шок со солзи во очите со силни и искрени прегратки мајката Лиле, снаите и четирите дечиња од семејството Илиевски ги пречекаа притворените мажи Душко, Цане и Томе.

По 12 дена поминати во истражниот затвор во Битола, притворените млекари Душко, Цане и Томе Илиевски осомничени за одгледување марихуана, се ослободени од притвор. Истражен судија од Битола донесе одлука притворените фармери да се бранат од слобода, а истрагата да продолжи со дополнителни истражни дејства.

„Ах, Томе, Томе, што ни направија“, плачеше и воздивнуваше мајката Лиле додека тројцата мажи ја тешеа и ја прегрнуваа. „Правдината излезе на виделина“, ја тешеше фармерот Дуле својата мајка. „Дванаесет дена бевме во притвор. Власта ми ја затвори цела фамилија. Ме понижи пред народот, иако чесно заработувавме. Мојата фамилија до ден денес ниту беше притворувана ниту имаше црна дамка. Што дочекавме, татко ми Томе на 57 години да одлежи притвор. Ова е голема трагедија што му ја направи власта на нашето семејство. Ова е голем притисок кон мене. Јас сум во шок“, рече фармерот Душко Илиевски, по излегувањето од притворот.

Тројцата фармери се најдоа на слобода откако специјалното обвинителство за организиран криминал и корупција во Скопје не најде елементи на организиран криминал, па предметот за фармерите Илиевски го врати во Битола пред Основното јавно обвинителство. Доцна попладнето фармерите добија решение да се бранат од слобода, но се очекуваше МВР да го потпише решението за одземање на патните исправи.

Убеден дека ова е политички монтиран процес против него, Душко вели дека неговата најсилна одбрана е во тоа што цело Градско Поле е обраснато со тревата за која полицијата го осомничува дека ја одгледувал. Илиевски ја обвини полицијата дека пред да му одреди притвор, физички и психички го малтретирала.

„Бев малтретиран ноќта во еден часот по полноќ. Ме тепаа во полиција да го признам делото. Не им потпишував дека сум го сторил делото со кое ме осомничуваат. Ме тепаше Вангел со други инспектори и маваше со стол по мене. Во затворот немав никакви притисоци. Беа крајно коректни спрема мене и спрема моето семејство“, зборуваше фармерот Илиевски. Ваквите негови изјави ги прекина адвокатот Васко Талевски, барајќи од фармерот да прекине со зборување и со откривање деталите од истрагата.

„Не знам зошто обвинителот бара дополнување на истрагата. Наш приоритет беше да се прекине притворот, па влегуваме постепено во нормална процедура. Ќе докажеме дека фармерите Илиевски не се виновни“, рече адвокатот Васко Талевски.

Откако во Битола се рашири веста дека тројцата фармери од фамилијата Илиевски ќе бидат на слобода, група граѓани се собраа пред неговиот дом да ги дочекаат фармерите. „Фала му на Господа дома да си дојдат кај фамилиите, децата да си бидат со родителите, дедото со внучињата. Зошто им го прават ова? Томе е болен човек, а неговите двајца синови работат мачно. Се мачат на нивите и во фармата. Триесет и пет илјади евра им држат во ’Сведмилк‘. Зошто го гласавме Никола Груевски за вака да му прави на народот? Зошто политички ги мачат луѓето? Тие само си ги бараат парите“, рече првата сосетка на Илиевски, Благица Здравковска.

Случајот со притворањето на тројцата фармери од семејството Илиевски последните две недели ја потресе Битола, ја дигна на нозе и опозицијата и власта. Полицијата ги осомничи за одгледување марихуана во нивната нива со компири во битолско поле, но освен 203 стебла од растението канабис сатива, не излезе со доказен материјал против фармерите за производство на дрога за што беа и кривично осомничени.

Опозициската СДСМ излезе на протести, маршираше пред истражниот затвор во Битола и собираше потписи за ослободување на фармерот Илиевски и на неговите најблиски.

Цврсто убедена дека овој случај е полициско-политички монтиран и дека фармерите завршија во притвор бидејќи Душко Илиевски, еден од водачите на протестите на „Сведмилк“, зборуваше против власта на митингот на СДСМ во Скопје. ВМРО-ДПМНЕ, пак, во фармерот Илиевски виде жива опасност за иднината на младината, квалификувајќи го дури и како дилер на дрога.

Судбината на млекарите Илиевски отиде и на највисоко ниво. Врз грбот на фармерите се препукуваа и лидерите на двете најголеми политички партии, СДСМ и ВМРО-ДПМНЕ, Бранко Црвенковски и Никола Груевски. (Б. Т.)