Балканската сага на Луан Старова во 12 тома

Со проектот се одбележува и 20-годишнината од почетокот на создавањето на балканската сага со објавувањето на романот „Татковите книги“ во 1992 година

Во почетокот на септември ќе се појават романите „Тврдина од пепел“ и „Ервехе“ како дел од проектот Избрани дела од академик Луан Старова во 12 тома што го реализира Здружението за уметност и култура на живеење „Дијалог“ од Скопје.

Во овој најобемен избор од романескната продукција на еден автор кај нас се презентира книжевната балканска сага на писателот Луан Старова по повод 50-годишнината од неговата литературна дејност и 70 години живот.

Со овој проект се одбележува и 20-годишнината од почетокот на создавањето на балканската сага со објавувањето на романот „Татковите книги“ во 1992 година. На литературната сцена Луан Старова се појави на почетокот на шеесеттите години на минатиот век и својот книжевен опус го создава на македонски, албански и француски јазик.

Покрај „Татковите книги“, во изборот влегуваат и познатите романи „Времето на козите“, „Балкански клуч“, „Атеистички музеј“, „Патот на јагулите“, „Тврдина од пепел“, „Ервехе“, „Љубовта на генералот“ и други остварувања на Луан Старова кои со голем успех се објавуваат на повеќе јазици во Европа и светот.

Уредник на проектот е Веле Смилевски, а секоја книга е опремена со предговори и поговори од истакнати македонски и светски критичари и есеисти, меѓу кои Едгар Морен, Георги Старделов, Матеја Матевски, Морис Друон, Гане Тодоровски, Ристо Лазаров, Леон Сомвил, Елизабета Шелева и други.

Проектот се реализира со поддршка на Министерството за култура.