Пронајдени загубени пирамиди во Египет

На сателитски снимки пронајдени се два комплекси кои содржат невообичаени групации насипи што би можеле да бидат загубени пирамиди

При истражувањето на сателитски снимки од Египет пронајдени се два комплекси кои содржат невообичаени групации насипи со интересни карактеристики, кои би можеле да бидат загубени пирамиди, тврди археологот Ангела Микол.

Потенцијалните пирамиди едни од други се оддалечени околу 150 километри.

На локација во горниот дел на Египет, 19 километри од градот Абу Сидхум, кој се наоѓа на брегот на Нил се пронајдени четири насипи, а на секој од нив се наоѓа триаголно плато. Двата поголеми насипи се широки околу 75 метри, а помалите се широки околу 30 метри.

- Кога детално ги анализиравме формациите, сфативме дека насипите имаат рамен врв и триаголен облик кој со времето е доста оштетен, истакна Микол.

Околу 150 километри северно, во близина на оазата Фајоум, друг можен комплекс пирамиди содржи четиристран оштетен насип широк 45 метри.

Во овој комплекс, лоциран на 2,5 километри од древниот град Димаиа, се наоѓаат уште три помали насипи со истакната формација, слична на дијагонално поставената пирамида во Гиза.

- Бојата на насипот е темна и според составот е слична на ѕидовите на Димаиа, кои се направени од кал и камен, нагласи Микол.

Научниците веруваат дека со помош на инфрацрвени зраци ќе можат да ја видат вистинската големина на комплексот со поголем број детали. Локациите се испратени на египтолози и експерти за понатамошно истражување.