Одземен златниот медал на белоруската фрлачка на ѓуле Остапчук

Со одлука на Меѓународниот олимписки комитет атлетичарката на Белорусија Надзеја Остапчук беше дисквалификувана поради користењето допинг

Атлетичарката на Белорусија Надзеја Остапчук, која освои златен медал во дисциплината фрлање ѓуле е дисквалификувана денеска со одлука на Меѓународниот олимписки комитет поради користењето допинг.

Таа остана без својот златен медал, откако не го поминала допинг тестот. Нејзиното „злато“ сега го има Валери Адамс од Нов Зеланд, која беше втора на натпреварите, кои се одржаа минатата недела.

Остапчук победи во тоа натпреварување, откако ѓулето го фрли 21,36 метри, во својот трет обид.

Британската фрлачка на ѓуле Брет Морс, која не успеа да се квалификува во финалниот дел од натпреварите во оваа дисциплина, подоцна ја обвини Белорусинката дека земала дрога за да може да победи. Своите обвинувања таа ги објави на Твитер, без притоа да даде образложение од каде има такви сознанија, па следниот ден мораше да и се извини. Сега се покажа дека Британката сепак била во право. Одземањето на златниот медал и дисквалификацијата заначат и крај на кариерата на Надзеја Остапчук, со оглед на нејзините 31 година.