Стивен Кипротич од Уганда победник на олимпискиот маратон

Кипротич патеката од 42 километри ја претрча за два часа, осум минути и една секунда оставајки ги зад себе фаворизираните маратонци од Кенија и Етиопија

Атлетичарот на Уганда, Стивен Кипротич победи на маратонската трка на Олимписките игри, последната атлетска дисциплина на годинешнава 30. Олимпијада.

Тој патеката од 42 километри ја претрча за два часа, осум минути и една секунда, оставајки ги зад себе фаворизираните маратонци од Кенија и Етиопија. Ова е прв златен меда за Уганда во маратонското трчање по 40 години.

Кипротич успеа да им побегне на своите директни конкуренти во последните километри на маратонот и да ја задржи победата до целта, на авенијата Мал, во центарот на Лондон, можејќи притоа уште и да земе од гледачите угандско знаме и нагрнат со него да ги истрча последните дваесетина метри.

Втор на целта пристигна Кениецот Абел Кируи, а трет беше Вилсон Кипротич исто така од Кенија, покажувајки ја на тој начин уште еднаш доминацијата на африканските маратонци.

Последната атлетска трка на лондонската Олимпијада, за разлика од порано се одржа далеку од главниот олимписки стадион, по улиците во централното градско подрачје, од авенијата Мал, во близина на Бакингамската Палата, до центар Сити и назад, при што маратонците истрчаа три кругови од над 10 киломери.

Обично, маратонците на Олимписките игри, својот старт и целта ја имаат на главниот олимписки стадион, каде се поздравени од гледачите, на последниот олимписки ден. Така било и на последните Игри што се одржани во Лондон, во 1948 година, но организаторите на годнешнава Олимпијада се откажаа од ова правило, па наместо осумдесетина илјади гледачи, колку што обично се собираат на стадионот, маратонците ги бодреа по патеката безмалку еден милион луѓе.

Маратонската трка на Олимпијадата во Лондон е прогласена за најгледана во досегашната историја на Игрите, затоа што огромна маса лондончани и туристи и навивачи се собраа по должината на целата патека, "вооружени" со знамињата на земјите кои имаа свои тркачи.

Од шеесетина маратонци кои учествуваа, десетина се откажаа во текот на трчањето.

Олимписките игри завршуваат вечерва со церемонијата, гаснење на олимпискиот оган и спуштањето на олимпиското знаме, кое ке му биде предадено на Рио де Жанеиро, домаќинот на Олимпијадата во 2016 година. Вечерашнава церемонија на затворање, според уметничкиот директор Ким Гевин ќе биде "Симфонија на британската музика".