Курдските бунтовници киднапираа уште 11 лица

Членови на Курдската работничка партија (ПКК) денеска киднапираа 11 возачи од градежен плац на аеродромот, што се наоѓа на околу 20 километри од Јуксекова, округ Хакари.

Курдските бунтовници запалиле 11 камиони и една градежна машина, а потоа ги киднапирале 11-те возачи.

На плацот е испратена противпожарна екипа за да ги изгасни запалените камиони.

Синоќа ПКК во југоисточна Анадолија го киднапира Хусеин Ајгјун, турски пратеник од главната опозициска Републиканска народна партија.

Градоначалникот на Дијарбекир, Мустафа Ташкесен, изјави дека пратеникот Хусеин Ајгјун заедно со двајца соработници бил во посета на избирачки регион. Тој бил киднапиран при враќање кон градот Тунџели од двајца вооружени бунтовници кои го нападнале автомобилот на пратеникот.

Подоцна беа ослободени двајцата негови соработници од кои еден е новинар на весникот „Ашкам“.

Киднапирањето ја шокира Турција бидејќи досега не е регистриран случај на киднапирање пратеник од страна на ПКК. Министерот за внатрешни работи Идрис Наим Шахин изјави дека ќе биде спроведена голема акција за ослободување на пратеникот.

Али Килич, советник на лидерот на  Републиканската народна партија Кемал Киличдароглу, изјави дека добиле информации дека Ајгјун ќе биде ослободен уште денеска. Тој не го соопшти времето и местото, истакнувајќи дека не е во ред да дава такви информации.

Килич се наоѓа во Тунџели, во источна Турција, каде се очекува да биде ослободен Ајгјун.

Турските сили за безбедност денеска започнаа голема операција со учество на воени авиони за спасување на пратеникот. Истовремено, ПКК побара турските сили за безбедност да ја прекинат операцијата за ослободување на киднапираниот пратеник.