Нов пожар кај скопска Радуша

Нов пожар е регистриран попладнево во село Радуша, во општина Сарај, а пожарот во село Кучково е ставен под контрола, соопшти Дирекцијата за заштита и спасување.

Пожарот во Радуша се појавил во 17:30 часот. Во тек е интервенција на дежурните екипи од Противпожарната бригада.

Дежурни екипи од ППБ, пак, ја надгледуваат состојбата во село Кучково, во Општина Ѓорче Петров, каде пожарот е под контрола.

Пожарот во Општина Јегуновце, Тетовско, кој избувна на 10 овој месец, во 12 часот, е изгаснат.

Авионите на Дирекцијата за заштита и спасување во моментот не дејствуваат, но се подготвени доколку има потреба, а Дирекцијата нема мобилизирано сили, стои во соопштението.