Билансот на загинатите во земјотресите во Иран достигна 306 лица

Билансот на загинатите во двата силни земјотреси, кои го погодија северозападниот дел на Иран достигна 306 лица, од кои повеќето се жени и деца, а 3.037 се ранети, изјави на седница на Парламентот министерката за здравство, Марзие Вахид Дастџерди.
Податоците се ревидирани по смртта на педесетина лица, кои починале во болниците.

Два силни земјотреси со интензитет од 6,3 и 6,4 степени според Рихтеровата скала во саботата ги погодија пограничните области на Иран со Азербејџан и Ерменија, каде живеат околу 300 илјади лица.

Иранските власти вчера соопштија дека се прекинати спасувачките операции за пронаоѓање на преживеани.

Последниот катастрофален земјотрес во Иран се случи во декември 2003 година, кога потрес со интензитет од 6,6 степени според Рихтеровата скала целосно го уништи древниот град Бам во североисточниот дел на земјата, а животот го загубија 31.000 лица.