Македонија го успорува отворањето на граничниот премин Станќиќ - Белановце

Според косовскиот министер за внатрешни работи за отворањето на преминот Станќиќ - Белановце застојот доаѓа од македонска страна

Косовскиот министер за внатрешни работи Бајрам Реџепи ја обвинува Македонија дека го попречува отворањето на граничниот премин Станќиќ - Белановце меѓу двете земји.

Како што објавуваат косовските медиуми, тој на вчерашната средба со новинарите во Приштина, информирал дека деновиве било планирано да почне изградбата на заедничкиот премин, но имало застој од македонска страна.

- Наспроти физибилити студијата и обезбедените фондови од Европската комисија, македонската држава ја забавува изградбата на заедничкиот премин меѓу двете држави, Станќиќ - Белановце, со образложение дека еден дел од патот, во должина од 12 километри не бил асфалтиран, поради што тие настојуваат преминот да не биде во функција 24 часа, изјавил Реџепи додавајќи оти ова барање на македонската страна било одбиено.

Македонските власти, подвлекол, барале преминот да биде од пониска категорија, односно да не работи 24 часа, што било спротивно на барањето на властите во Приштина.

- Ние баравме преминот да работи 24 часа и за проток на стока, додека Македонците поради штедење или други причини инсистираа тој да биде од Б или Ц категорија, изјавил Реџепи.