Претседателот Иванов на ифтарска вечера кај турскиот премиер Ердоган

Во обраќањето на ифтарската вечера претседателот Иванов го честита празникот и посака да преовладува чувството на мир, љубов, толеранција..

Претседателот на Република Македонија Ѓорге Иванов за време на престојот во Република Турција, каде летуваше со своето семејство, оствари средба со турскиот премиер Реџеп Таип Ердоган.

На покана на премиерот Ердоган, претседателот Иванов и неговата сопруга синоќа присуствуваа на ифтарската вечера, приредена во Истанбул, по повод големиот муслимански празник Рамазан.

Во обраќањето на ифтарската вечера, претседателот Иванов им го честита празникот додавајќи дека во овие мигови на празнување посакува кај сите верници да преовладува чувството на мир, љубов, толеранција и меѓусебно разбирање. Да преовладуваат вредностите кои ги зближуваат, а не ги разделуваат луѓето и народите.

- Доаѓам од земја која посветено ја негува вековната традиција на мултиетнички и мултирелигиски соживот. Соживот кој претставува наша голема придобивка со која се гордееме. Придобивка која покажува дека местото на нашата земја и е во рамки на европското семејство на нации и држави. Нашиот исклучителен придонес како земја во која вери, традиции и разни етнички групи соработуваат на градењето на заеднички дом, е доказ дека е можна подобра иднина за регионот, Европа и светот, истакнал претседателот Иванов на вечерата, соопшти денеска неговиот Кабинет.

Премиерот Ердоган изразил задоволство што овој значаен празник за муслиманскиот свет, го одбележува заеднички со македонски претседател. За турскиот премиер ова е уште еден доказ за почитта на претседателот Иванов кон Рамазан и верниците од муслиманската вероисповед, што истовремено оди во прилог на традиционално пријателските и блиски односи меѓу двете земји.

На вечерата биле присутни познати личности од сферата на политиката, бизнисот, верските заедници и јавниот живот на Турција. Меѓу присутните бил и Вселенскиот Патријарх Вартоломеј со кого претседателот Иванов имал срдечна средба.

Инаку, поканата до македонскиот претседател, премиерот Ердоган ја упати уште за време на неговата официјална посета на Република Македонија, минатата година, поздравувајќи го гестот на претседателот Иванов, кој секоја година присуствува на ифтарската вечера во Република Македонија, заедно со поглаварот на Исламската верска заедница.

Претседателот Иванов вчера во телефонски разговор со претседателот на Република Турција Абдула Ѓул му го ��еститал празникот Рамазан посакувајќи му лична и семејна среќа. Разговарајќи за актуелните состојби во регионот, повторно беа потенцирани одличните севкупни билатерални односи меѓу Република Македонија и Република Турција.