Македонија избира најпопуларни евергрин композиции



Од 100 предложени композиции ќе бидат избрани најдобрите 20 нумери, кои ревијално ќе бидат изведени на гала вечер на 26 октомври во Универзалната сала

ФОТО: Киро Попов

Од денеска и официјално започнува гласањето за избор на евергрин композиции во изминативе половина век. Од 100 предложени композиции ќе бидат избрани најдобрите 20 нумери, кои ревијално ќе бидат изведени на гала вечер на 26 октомври во Универзалната сала, во организација на продукциската куќа “Green Entertainment” и ПР агенцијата „Chapter 4“ Македонија.

„Граѓаните може да гласаат по пат на СМС на телефонскиот број 141 772 од сите мобилни оператори. Листата со нумери се објавува во изданијата на МПМ- „Утрински весник“, „Дневник“ и „Вест“, а може да се најде и на официјалната вебстраница, како и на вебстраницата на магазинот Теа Модерна, каде ќе може да се гласа од 10 септември 2012 година, објасни Душко Ѓошевски, проект менаџер на „Евергрин МК“, на вчерашната прес конференција во тенискиот клуб на „Александар палас“.

Гласањето ќе заврши на 28 септември, а изведувачите на нумерите на гала вечерта ќе настапат во придружба на симфонискиот оркестар при МОБ, а под диригентската палка на Бисера Чадловска. Уметнички директор на манифестацијата е Драган Б. Костиќ, а директниот пренос ќе го врши телевизија „Алфа“. (К.Ш.)