Жртвите кај Смиљковци убиени со три типа оружје



Mинистерката за внатрешни работи Гордана Јанкулоска изјави дека имало поголем број истрели од три различни агли и било пукано непосредно, во горниот дел на телата на жртвите

ФОТО: Петр Стојановски

Обудкцијата врз петтемина убиени кај езерото во село Смиљковци покажа дека во нив е пукано од три типа оружје, зашто се најдени чаури од три различни типа муниција. Тоа сугерира дека има повеќе од еден извршител на грозоморниот чин.

Mинистерката за внатрешни работи Гордана Јанкулоска попладнево, соопштувајќи најнови податоци за истрагата, изјави дека имало поголем број истрели од три различни агли и било пукано непосредно, во горниот дел на телата на жртвите. Смртта настапила од огнострелните рани кои биле видливи.

Полицијата трага по сторителите и за нивно пронаоѓање досега на информативен разговор повикала педесетина лица, а соработува и со полициите на соседните земји.

За што повеќе информациии, МВР отвори и посебна телефонска линија 199 на која, покрај редовната на 192, може да се јавуваат какви било информации што можат да помогнат во истрагата.

Јанкулоска рече дека сите информации се анализираат и дека се можни сите опции за тоа кои се извршителите. Не е исклучено тие да се и надвор од државата, а исто така жртвите да биле и случајна цел.

- Не би сакала да шпекулирам. Постојат многу варијанти, но изнесување премногу информации во јавноста може да им биде во корист на сторителите. Ги разгледуваме сите опции. Службите во соседните земји се спремни за соработка... Сакам да ги уверам граѓаните дека преземаме најенергични мерки за расчистување на ова петкратно убиство и да им порачам на извршителите дека не може да и избегаат на правадата, рече Јанкулоска од Оперативниот штаб лоциран во Полициската станица Гази Баба.

Четирите убиени момчиња, кои денеска беа погребани, немале проблем со никого, ниту во околината, ниту, пак, имале какво било досие. Петтиот убиен од село Црешево, бил убиен на неколку метри подалеку од нив.

Јанкулоска апелираше граѓаните да се воздржат од шпекулации и од подгревање меѓуетнички тензии бидејќи се уште не се знаат извршителите на убиството. Рече дека е најсериозно кривично дело на кое МВР досега работело и оти поради тоа мотивот е поголем да се откријат и најстрого да се казнат сторителите.

- Од информациите што ги имаме воопшто не може да се констатира ниту етничката припадност, ниту идентитетот на сторителите. Затоа апелерам за воздржаност од шпекулации кои би можело да ги подгреат меѓуетничките тензии. До овој момент немаме податок ниту за евентуалните мотиви на петкратното убиство. Сите информации кои случајно или намерно се пласираат во јавност, а се поврзани со меѓуетничките односи во Македонија, се во доменот на шпекулации, зашто досегашниот тек на истрагата нема потврда за тоа, истакна министерката за полиција.

Таа ги повика граѓаните кои вечер ќе се собираат во црквите по повод Велигден да не го нарушуваат јавниот ред и мир, за полицијата да биде повеќе фокусирана на расчистување на убиството, отколку да се дисперзира на различни локации. Посочи дека на терен е целиот полициски состав и дека состојбата е под контрола.