Пресуда

Бајруш Сејдиу доби 12 години затвор

26.01.2011, 19:44

Основниот суд Скопје 1 денеска му изрече 12-годишна затворска казна на кумановецот Бајруш Сејдиу за кривично дело „перење пари и насилство“, за случајот „Пепел 2“.

Сејдиу и уште 13 лица беа обвинети за малверзации и стечајни постапки во кумановски фирми „КЕН“, „Жито мел“, „Искра инженеринг“ и за ЗИК „Сточарство“.

Неговиот брат Наим Сефери кој е во бегство доби 15 години затвор, стечајниот управник Зоран Стојанкиќ 13 години, а останатите десет обвинети добија од две до 10 години затвор.

По изрекувањето на казната Бајруш Сејдиу побара да му се смени притворот во Шутка со куќен притвор, бидејќи има болна жена и мајка. Укинување на притворот побара и Зоран Стојанкиќ, и обвини дека одлуката на судот е противуставна и политичка. Сепак, судијата одлучи двајцата да останат во притвор до правосилноста на пресудата.

Според адвокатите на обвинетите, изречените казни се превисоки, а пресудата нејасна.

Сејдиу во март лани беше осуден на пет години затвор за случајот „Пепел“, но оваа пресуда се уште не е правосилна. Во овој судски процес им се судеше на вкупно 32-ца обвинети во криминалот со фалсификување на цигари, неплаќање акцизи и злосторничко здружување. Бајруш Сејдиу повеќе од две години е во притвор во „Шутка“.