Последен воз за откуп на дворовите

Уште утре ќе може да се поднесе барање за приватизирање на земјиштето само со лична карта

Билјана Ангеловска

Вистински метеж владее деновиве во Агенцијата за катастар, а уште повеќе во подрачните единици на Управата за имотноправни односи. Можноста само со лична карта да се поднесе барање за откуп на дворното место придонесе максимално да се зголеми бројот на граѓани што аплицираат за приватизација на земјиштето околу своите куќи. Илјадници граѓани ги запоседнаа шалтерите брзајќи да го фатат последниот воз и до четврток, до кога истекува крајниот рок да ги достават барањата. Во спротивно, дворовите ќе останат во државна сопственост, а граѓаните ќе треба за нив да плаќаат кирија во висина од пет проценти од вредноста на земјиштето.

Од Управата за имотноправни работи информираат дека само во текот на вчерашниот ден во подрачните единици пристигнале 7.290 барања за приватизација на дворното земјиште. Од септември 2009 година, кога стартуваше продажбата по цена едно евро за квадратен метар, досега се поднесени вкупно 62.589 барања за откуп на дворовите. Дека граѓаните го чекаа последнио�� момент за да аплицираат покажува и податокот дека само во понеделникот биле поднесени повеќе барања отколку во целото прво полугодие од 2010 година.

Од Министерството за финансии ги охрабруваат сите оние што сакаат да си го приватизираат земјиштето под и околу своите куќи да ја искористат погодноста само со лична карта да ја почнат постапката за откуп додека останатите документи ќе можат да ги достават дополнително. Оттаму појаснуваат дека е доволно граѓаните до четврток да отидат само со лична карта до Управата за имотноправни работи, каде што ќе им биде дадено да пополнат барање, а во текот на постапката Управата ќе ги извести дополнително кога да ги достават другите потребни документи.

Со оглед на тоа што Министерството за финансии релативно доцна реши максимално да ја поедностави постапката за поднесување барање само со лична карта, а не со комплетна документација, деновиве имаше огромни турканици и пред шалтерите во Катастарот, од каде што треба да се добие имотниот лист за куќата, односно станот.

„Бројот на поднесени барања за издавање имотен лист е зголемен во сите 29 подрачни одделенија на Агенцијата за катастар на недвижности, без исклучок. Само во Центарот за недвижности Скопје и во дисперзираните канцеларии што се наоѓаат во управната зграда на Агенцијата во Автокоманда, во општините Кисела Вода и Чаир, од почетокот на јануари до завчера се поднесени вкупно 21.830 барања за имотни листови. Веднаш е одговорено по сите, односно граѓаните веднаш добиле имотен лист“, велат од Агенцијата за катастар на недвижности.

Оттаму појаснуваат дека во скопскиот Катастар и во трите дисперзирани канцеларии во последниот месец дневно се поднесувале од 1.500 до 1.750 барања за имотен лист. А, за да им се излезе во пресрет на граѓаните, шалтерите во последниве две недели работат со продолжено работно време до 20 часот, како и во деновите на викендот.

Државата засега не планира да го продолжи рокот за откуп на дворовите. Како што неодамна изјави министерот за финансии, Зоран Ставрески, по истекување на рокот ќе се направат анализи и доколку се констатира дека, сепак, има потреба, таквата можност не се отфрла.

Инаку, според законот, сите граѓани што нема да поднесат барање за откуп на дворното место до 27 јануари, во иднина ќе плаќаат годишна закупнина во висина од пет проценти од вредноста на земјиштето. Колку точно ќе изнесува киријата ќе зависи од самата вредност на земјиштето, поточно од степенот на неговата комунална уреденост. Надлежните појаснуваат дека допрва ќе се прави поделба на зоните во градовите, според кои и ќе се вреднува земјиштето.