Поглед

Погрешен начин за зголемена наплата

Мирче Јовановски

Наплатата на радиодифузната такса никако да се среди. Ниту најновиот обид да се воведе ред во списоците не даде плод. Напротив, наместо тоа, дополнително внесе хаос. На иста адреса почнаа да стигнуваат не едно, туку по две, три, па и повеќе сметки.

Граѓаните со право се револтирани и се чудат како се случило МРТ да ги добие податоците за сите членови на едно семејно домаќинство. Се прашуваат што да прават сега, особено ако на грешката што е направена во јавниот сервис се надоврзе и евентуална грешка на УЈП, па по автоматизам да почне да им симнува од трансакциските сметки и пари за сметката и казнена камата. Нема никаква гаранција дека такво нешто ќе се избегне.

Попусти се оправдувањата од страна на МРТ и од надлежните кои се затскриваат зад штуро соопштение. Уште повеќе, непристојно е топката и во ваква ситуација да се префрла кај оние што се најмалку виновни за настанатата каша-попара, а тоа се обичните граѓани. Притоа, од мала помош е што се даваат неколку алтернативи – тоа да го направат по пошта, да се јават на еден од неколкуте телефони или, што е најмалтретирачки, самите да се јават на шалтерите во МРТ.

Никој не спори дека МРТ треба да го реши финансирањето на сопствената дејност и финансиски да застане на нозе. Тоа е условот без кој не се може да се прави квалитетна програма каква што му прилега на еден национален јавен сервис и која ќе биде во функција на граѓаните и на националните, а не на партиските интереси.

Но, МРТ одбра погрешен рецепт за да ја зголеми наплатата. Тоа не се прави со вештачко зголемување на списокот на претплатници, туку со поефикасни мерки и со подобра ТВ и радиопонуда. Како што тргнала, вака само го зголеми раволтот кај граѓаните токму во моментот кога прави сериозни напори да го подобри имиџот, во што има и резултати – со прикажувањето престижни ТВ-серии и филмови, со ребрендирањето, визуелните измени во дневникот...

Што им преостанува на граѓаните? За жал, ништо. Освен можеби да чекаат своите податоци да ги видат на ТВ-екраните. Како што тргнала работата, заштитата на личните податоци кај нас е таква што нема да изненади и ако се случи такво нешто.