Мое ќоше

Во земјата на спомениците

Ерол Ризаов

Неделава што измина прочитав четири возбудливи вести: пристигна нова тура споменици од светот франко Скопје. Се истовараат како на кванташки пазар од шлепери, ѓутуре, има нешто и рефус. Ќе се редат на новиот, стар скопски театар, како што се стокмија паметниците на покривот на Министерството за надворешни работи и како што ќе се наполни мостот „Око“, на кој му дадов прекар „полно око празна рака“. Ете тоа е мојот фаворит, првата вест на неделата, која речито зборува за континуитетот на една успешна политика, за чудесната преродба со споменикоманија. Вратено е достоинството и гордоста на нацијата, излечени се повеќедецениските комплекси дека сме словенски варвари. Со помош на мудрата политика си обезбедивме минато какво што нема никој и кое допира до корените на човечката цивилизација. Докажавме дека човештвото и културата тргнале од Македонија. Деновиве успеав да прочитам во нашите весници неколку сјајни анализи што ги изнесуваат на чистина арамиите и фрлаат нова светлина на светската наука. Духовниот папок на светската култура бил во Македонија. Штета што ни ја украле комшиите. За жал, и тие не се офајдиле нешто многу од нашата култура. Ги казнил Господ.

Втората вест е дека телохранители ќе ги чуваат спомениците. Општина Центар во главниот град беше најбрза и најоперативна, бидејќи на нејзина територија има најмногу споменици по глава на жител. Веднаш откако се забележаа неколку хулигански инциденти и вандалистички напади врз уметничките дела со непроценливо богатство, оперативните функционери на најбогатата општина во земјата донесоа храбра одлука. Да издвојат 120.000 евра годишно од џебот на скопјани за одбрана на спомениците од разни словенски варвари и други зулумќари. Навистина, добро е што се презема ваква акција. Лично се уверив во тоа. Некни, квечерина, додека пешачев по кејот, забележав еден таков како моча кај нозете на императорот Јустинијан. Прав вандал, по суратот видов дека не ни знае кој е Јустинијан. Затоа итно треба да се охрабрат сите општини во Скопје и во Македонија веднаш да ангажираат агенции за заштита на спомениците. За секое мочање на јавно место или пред споменик глобата е 50 евра, така вели законот. Не видов колку чини голема нужда.

Вториот проблем е со гулабите и чавките што ги кашкаат спомениците. Тоа ќе се реши на поевтин начин. Ќе се ангажираат луѓе кои ќе се преправаат во плашила за птици. Така ќе се заштедат пари, а ќе се намали и невработеноста. Од плашила нема подобра заштита од птици. Најпогодни да изигруваат страшила се пензионерите опозиционери. Проблемот е што во нив не може да се има доверба. Затоа вмровците ќе си стават млади храбри патриоти да си ги бранат спомениците од птиците.

Третата вест е лоша, ме онеспокои. Една ретка агенција која не лаже „ТНС брима галуп интл“, членка на светската мрежа компании за истражување на јавното мислење „Галуп интернационал“, откри загрижувачка вистина: најголемиот и најскапиот владин проект „Скопје 2014“ ја губи поддршката кај народот. Според истражувањето на јавното мислење, дури 57,8 отсто од испитаниците не ги сакаат спомениците и не сакаат барок и рококо-архитектура. Само 26,4 отсто од испитаниците позитивно се изјасниле за нашата споменикоманија. Додека, пак, индиферентни, или баш ги заболе, биле 15,8 отсто. Ако се погледаат податоците од истражувањето на меѓунационален план, лесно се гледа дека Албанците се на мислење дека проектот стимулира омраза. Само 3,3 отсто од Албанците позитивно се изјасниле за „Скопје 2014“, а цели 88,6 отсто искажале негативно мислење со јасна алузија дека го сметаат за манифестација на македонски национализам. Кај Македонците и другите етнички заедници расположението за „Скопје 2014“ исто, главно, е негативно, односно 48,1 процент се со неповолно мислење, а една третина 33 отсто имаат симпатии кон проектот. За мнозинството граѓани на Македонија проектот е неприфатлив поради расипништвото и трошење на државните пари за историски манипулации, корупција и кич.

Четвртата вест, конечно, е најдобра и ги покрива сите други. Министерот за финансии, Зоран Ставревски, обезбеди нов заем од 250 милиони евра за буџетските дупки. Е, сега може раат да одиме на избори.