Насловна

Мерки

Новинарите од А1 на принуден одмор

Даниела Трпчевска

Со десетминутни технички вести, без презентер и со намалена новинарска екипа – вака од денеска ќе работи телевизијата А1, која веќе со месеци се соочува со замрзнати сметки и големи проблеми во работењето. Повеќето новинари во наредниов период ќе бидат на принуден одмор, кој ќе трае до 10 август, до кога е рокот за намирување на долговите од девет милиони евра, кои Управата за јавни приходи бара да се исплатат од страна на десетина фирми од „Перо Наков“, сопственост на Велија Рамковски.

„Ваквите мерки се преземаат во функција на штедење и намалување на трошоците во телевизијата. Веќе сме сосема исцедени, но и натаму ќе ја исполнуваме нашата обврска за информирање, со емитување 10-минутни вести во досегашните термини“, вели главниот и одговорен уредник на А1 телевизија, Младен Чадиковски.
Според него, периодот од еден месец, кој е одреден како колективен одмор за најголем ден од вработените во телевизијата, ќе биде искористен за да се размисли за иднината на медиумот и што да се прави понатаму. „Најголем дел од вработените ќе бидат на колективен одмор до 10 август, до кога е рокот за намирување на долговите. Дотогаш ќе треба да се консолидираме внатрешно и да одлучиме што понатаму“, вели Чадиковски по повеќечасовните средби и разговори што ги одржаа вчера со вработените.

Ваквата одлука е донесена само еден ден откако згаснаа трите весници „Време“, „Шпиц“ и „Коха е ре“, кои ги издава компанијата „Плус продукција“, а стотина новинари од сите три медиуми заминаа на принуден одмор.

„Повеќе не сме во можност да ги издаваме весниците бидејќи немаме ниту хартија ниту бои, а познато е и тоа дека ни беа одземани и возилата со кои ги дистрибуиравме весниците“, изјави во петокот Коле Чашуле, главен и одговорен уредник на весникот „Време“, пред излегувањето на последното издание на весникот. Ситуацијата во весниците се проблематизираше откако Управата за јавни приходи побара да биде платен данок што го должеле кон државата. Тие неколку дена излегуваа на намален број страници и во црно-бела боја се' додека не се потрошија сите залихи од хартија.

Сопственикот на медиумите, Велија Рамковски, и 22 негови соработници се во притвор од декември минатата година.