Почина големиот пријател на Македонија, Ото фон Хабсбург
04.07.2011, 12:44
Ото фон Хабсбург, син на последниот австроунгарски цар, и голем пријател и поддржувач на Македонија, почина вчера на 98 години во својот дом во Баварија.
За исклучителниот придонес за јакнењето на меѓународната положба и углед на Република Македонија и за промоција на нејзината европска иднина преку неговиот ангажман како претседател на Паневропската унија и член на Европскиот парламент македонскиот претседател Ѓорге Иванов го одликува со Орденот за заслуги за Македонија.
Тој во 2006 година го доби и престижното признание - Плакета и диплома "Борис Трајковски", што го доделува Паневропската унија на Македонија.
Ото фон Хабсбург е син на Карло Први, последниот император на Австро-Унгарија и наследник на династијата Хабсбург. Дал силна поддршка за независноста на Република Македонија и нејзин брз прием во ЕУ. Како израз на таа поддршка, својата прва од бројните посети на Македонија ја има набргу по независноста, во раните 90-ти години на минатиот век. Неговите потомци, синовите Карл и Ге��рг, како и една од ќерките - Валборга исто така се постојани поддржувачи на Македонија.
Роден е во 1912 година. По укинувањето на монархијата во Австрија и во Унгарија, заедно со семејството живеел во повеќе европски држави, а од своја деветгодишна возраст, по смртта на татко му, е носител на династијата.
Во својата политичка активност, Ото фон Хабсбург е познат како противник на фашизмот пред и на комунизмот, по Втората светска војна. За тоа добил смртна пресуда од Хитлер.
Фон Хабсбург бил пратеник во Европскиот парламент од редовите на германската партија ЦСУ од 1979 до 1999 година, а од 1973 до 2004 година и претседател на Паневропската унија, движење почнато во 20-ите години на минатиот век, кое се бори за обединување на европскиот континент, врз основа на заедничките вредности. Движењето, под негова закрила, активно учествува во уривањето на комунистичките режими во источна Европа, и особено во уривањето на Берлинскиот ѕид.
|
