Насловна

Поглед

Татковски инстинкт

Љупчо Поповски

Се бара маж без деца, особено без малолетни, со желба за патувања и чести отсуства од дома за министерско место во новата влада - сектор надворешни работи. Ако македонската влада пред две-три години правеше кампањи за повеќедетни семејства и даваше примери преку своите министри и пратеници, па дури и премиерот, за зголемување на наталитетот на македонската нација, сега е време да даде оглас за пополнување на местата со луѓе без обврски, т.е. семејства што би ги извршувале високите државни функции за да се избегнат оставки и повлекувања поради разбуден татковски и мајчински инстинкт.

Прв што потклекна под товарот на семејните обврски наспроти државните е досегашниот шеф на дипломатијата, Антонио Милошоски. Младиот министер по пет години и по изминати стотици илјади километри по белиот свет во име на македонската кауза, сфатил дека татковството му е поважно од државата и се откажа од министерското место! Милошоски сега за да биде повеќе со својот четиригодишен син, ќе се задоволи само со функцијата претсе��ател на Комисијата за надворешна политика во Собранието каде што ќе ги сослоушува идните амбасадори пред да заминат од земјава. Тоа народски се вика од коњ на магаре, но дома си е дома, а татковството си е татковство.

Се надеваме дека примерот на Милошоски нема да ги стави на мисла другите млади родители-функционери, вклучително и премиерот, дали се добри татковци или мајки, па татковството да стане нов тренд во ново-старата влада. Кај ќе најдеме толку слободни функционери на кои нема да им биде проблем да отсуствуваат од дома. Затоа во огласот за новите министри безусловно да стои: работно време 24/7 во влада каде што светлата во канцелариите не се гаснат до доцна во ноќта.